إبراهيم مبشور
نايضة على الشوارع و الأزقة فتمارة بعدما ولات عندها أسماء وعاظ من الخليج والمشرق. ما عرفتش كيفاش دازو هاد الاسماء و كاينة لجنة من الداخلية هي للي تدير الأوكي أو ترفض أو تحفّظ عن بعض الأسماء؟
هاد اللعيبة تاع العقدة للمشارقة ماشي جديدة، حتى الاتحاديين ملي كانو شادين جماعة المعاريف فكازا و بغاوْ يعربُو الأزقة و الشوارع، طاحو على اعلام ديك المنطقة والأغلبية ديالهوم مغمورين بالنسبة للمواطن العادي، فمثلا زنقة Mont Cinto سماوها ابراهيم النخعي. أصلا “خ” مع “ع” تتجمع ليك فالفم غير ملي تتبغي تنخم! على قلة الاسماء والاعلام فالمغرب، زعما هاد المغرب قبل ما يبانو الرومان حتى لهنا ما داز عندهوم حتى شي راجل كابابل ولا شي امْرا حادڭــة يلصقو اسمياتهوم فراس الدرب؟
كون جاوْ عليا أنا، حتى أعلام الكوميديا والحلقة نديرهوم أسماء تاع الزناقي، وما لها؟!علاه حنا عدنا الزناقي تباركلّاه ديال فيينا؟، راه كل درب فيه حانوت ومول الجافيل وبزناس فالقنت والدراري لاعبين ماسّة و50 ميكة د الزبل تطنطن فيها الشمس ديال الطناعش وحايط مكتوب عليه “ممنوع البول”.
زعما ما يستاهلش بقشيش الدّوريجين تعلّق اسمو فالزنقة ولا محمد القدميري؟ أو الثنائي قشبال و زروال؟
فالدرب ديالنا تتفرع عليه واحد الزنقة مسدودة، غارقة وقاعها بحجم ملعب الباسكيط . غادي نقتارح على واحد البيجداوي فالمجلس يسميها “زنقة الشيخة الطراكس”.
