من صفحة الأستاذ احمد الدافري
معنا بعض بنادم هنا، مع الأسف ثقالين على القلب، كيبغيو يبانو عميقين، وباغين يمارسو علينا الوصاية احنا للي كنطنزو على لالجيري بسبب إقدام وليداتنا على سحق أبنائهم في الكرة داخل ديار لالجيري، وكينتقدونا زعما، وكيعتبرونا براهش، وبأننا نقوم بتسييس الكرة..
شكون للي كيسيّس الكرة؟
شكون للي كيمنع فرق رياضية مغربية من السفر إلى لالجيري عبر رحلات مباشرة من المغرب إلى لالجيري؟
شكون كيمنع الصحافيين المغاربة من تغطية تظاهرات رياضية تنظمها لالجيري وكيطردهم بدعوى أنهم جواسيس؟
شكون للي فالإعلام ديالو ما كيذكرش اسم المنتخب المغربي وكيقول انهزمت إسبانيا، انهزمت كندا، انهزمت البرتغال، انهزمت بلجيكا، انهزمت البرازيل وما كيقولش شمن بلد هزمهم؟
شكون الرئيس للي فينما كانت شي مناسبة رياضية ديال بلادو فارع لينا الك…. بمليون ونصف مليون مبروك؟
شكون للي طالق علينا الذباب والقاذورات الفيسبوكية والتويترية والإنستاغرامية وفين ما حقق المغرب شي إنجاز رياضي كيشوهو وكيطلق فمو الخانز ضد رجال ونساء المغاربة وضد ملك وشعب المغرب؟
شكون للي العسكر ديالهم كيتلاقاو الرياضيين وكيشحنوهم وكيعمروهم على المنتخب المغربي للي كيسميوه المنتخب الخصم؟
دابا احنا عاد غاديين نتسناو زعما شي حد للي يورينا أنه ما خاصش الخلط بين الرياضة والسياسة؟
زعما احنا مكلخين حمير ما فاهمينش وكنتسناوكم انتوما الزوينين المثقفين المفكرين الواعرين تطلعو فوق المنبر وتخطبو علينا وتوريونا أننا ما خصناش نسيّسو الكرة؟
دابا بالنسبة ليكم عادي أن قاذورات حقيرة مسمومة يسميو بلادك المروك، وانتوما يعجبكم الحال وما تسميوهومش سكان لالجيري، ويسميوكم ولاد بوسبير وانتوما تقولو ما كاين مشكل وما تسميوهومش اولاد فرنسيس، ويسبو ملككم ويروجو الأكاذيب عليه وانتوما تقولو ما كاين باس وتتكلمو باحترام على التبون وعلى رئيسه البوال؟
آه. زعما أنا كنروج خطاب الفتنة.
وانتوما زعما حكماء ومصلحون سياسيون ومفكرون عالميون.
الفهامة ديالكم من فضلكم خليوها عندكم..
بنادم للي رباه النظام ديالو على الحقد عليك ما عمرو يبغيك أو يحترمك.
وإيلا كنتي كتظن أن الرياضة فالعالم كلو ما معمولاش باش تخدم السياسة، وبأن السياسة الرياضية معمولة باش تخدم مصالح الدولة، راك ما فاهم والو.
غير معاودين ليك على الرياضة.
إيلا بغيتي تمارس الرياضة بلا سياسة سير مارسها فلاصال أو فملعب القرب فالحومة.
وملي تسالي دوّش وسير نعس.
أما التظاهرات العالمية والقارية والإقليمية راه البليد هو للي ما كيعتبرش الرياضة سياسة.
ملي كيربح أي منتخب راه كيهز راية بلادو وكيغني النشيد الوطني ديال بلادو. ماشي كيهز راية ديال الفيفا وكيغني نشيد يا طيبة يا دوا العيانا.
فهمتي؟.
وإيلا ما فهمتيش عاود قرا من البداية. وهذا ما كان.
