ابراهيم مبشور
الغلاء بأسباب سعر المازوط؟ ايه المازوط غالي و لايني راه ارباب النقل فالايام الاولى د مارس اخداو الدعم من عند الدولة والدفعة الثانية فهاد الأيام.
أزمة مياه؟ ايه كاينة ازمة مياه و لايني هاد العام أقل جفافا من الموسم الماضي ولكن الموسم الماضي الاسعار كانت ارحم نسبيا.
الخضر والفواكة تتمشي للخارج؟، فعلا تتمشي وحتى للاسواق الافريقية، سولو الناس للي عندهم معرفة بهاد الضومين يقولو ليك شحال تيربحو فرموك د بطاطا أو البصلة للي غادي مثلا للمالي ومعفي من مصاريف التبريد ( ماشي بحال الطماطم مثلا).
عندي معلومة بالارقام و للي يقول غالطة يجي يمسخني في وجهي: صادرات المغرب من الفريز فالموسم الماضي اللي اعرف شح فالتساقطات، وصلات القيمة ديالو بالعملة الصعبة 70 مليون أورو، بزيادة 17% من السنة للي قبل منو و للي اعرف تساقطات متوسطة مقارنة مع موسم 2021- 2022. هذا تيعني أن حيتان التصدير ما تيهمهم لا ترشيد المياه و لا السوق الداخلي. و الغريب أن اول زبون ديال الفريز فالموسم الماضي هي اسبانيا للي عادة تتستورد من عندنا اليد العاملة الموسمية للي تيخدمو فحقول الفريز فبلادهم. وفالمرتبة الثانية كتجي بريطانيا…
كيفما بغاو يكونو الاكراهات الاقتصادية وإن كانت صحيحة ميا فالميا، فهذا لا يبرر هاد العافية الزرقا للي شاعلة فالقفة. راه تحلل حتى تعيى وما يمكنش ما تستحضرش تغول لوبيات وسماسرة ووسطاء للي ولات عندها اليد الطولى فهاد التبهديلة المعيشية، ماشي غير فالفلاحة ولايني فجميع القطاعات، لدرجة ولات تتبان ليك دولة وسط دولة، دولة معروفة بالمؤسسات ديالها ودولة متخفية فجلباب كيانات جمعات بين السلطة والمال، غير خاضعة للمساءلة والخوف كل الخوف تولي تشوف راسها فالمراية وتبان اكبر من الدولة.
والسلطات المعنية؟ واش ما كايناش؟ اللاوعلم ! المهم للتذكير: نهار سد المغرب فحملة كوفيد للي كانت فمنتصف مارس 2020، رغم أن كولشي وقف تقريبا من غير قطاع الصحة و ما يدور في فلكه، بقات اسعار الخضر و الفواكه فالمتناول، حيث السلطات كانو حازمين مع الوسطاء و مافيات التلاعب بالاسعار. ايلا قلت ليك تدخل حازم راه تدخل حازم نيت.
يقدر يقول قائل، راه حكا القص بقى فالمتناول حيث الخضار والفواكه ما كانوش تيخرجو، ألا أسيدي كانو تيخرجو، تنقل خوروطو هو للي ممنوع و الباقي داخل خارج ليل نهار.
