گالت المندوبية السامية للتخطيط، فدراسة العنوان ديالها “الاتجاهات والتفاوتات في مواجهة الموت بالمغرب”، بأن الأغنياء كيعيشوا فالمعدل أربع سنين زايدة على الفقراء.
ولكن على العموم متوسط العمر عند المغاربة ارتفع بزاف. وبعدما كان المغربي فالمتوسط كيعيش 47 سنة فالستينات ولى دابا فالمتوسط كيعيش أكثر من 75 عام.
هاذ الارتفاع بطبيعة الحال جا بفعل بزاف ديال العوامل منها بالأساس ارتفاع فرص الوصول للرعاية الصحية اللي ما كانتش متوفرة من قبل لفئات كبيرة من المجتمع.
وبالرغم من هاذ الشي الدراسة لاحظت أنه كاين واحد التفاوت فأمد الحياة بين المدن والبوادي. وعلى عكس الفكرة المغلوطة اللي منتشرة عند الناس، السكان ديال المدينة كيعيشوا آكثر من الناس ديال البادية، لأن عندهم فرص ديال التطبيب والاستشفاء أكثر من اللي هو متوفر فالبادية.
