هذا خالد وية، المدير السابق للوكالة الحضرية ديال مراكش، شدّاتو الشرطة القضائية فحالة تلبس فشهر يوليوز الماضي و هو كيشدّ من عند أحد المنعشين العقاريين اللي كيخدموا فالبني شيك فيه 886 مليون سنتيم و خمسين مليون أخرى كاش خباها فالكوفر د الطوموبيل.
هي تقريبا مليار سنتيم أ مولاي غا رشوة باش السي المدير يسني ليه على وراق باش يقدر يبني المشاريع ديالو.
مشاو عندو للدار لقاو ملاين أخرى و مقتنيات غالية بزاف، فاش سولاتو الشرطة من أين لك هذا، قال ليهم غي كادووات من أصدقاء !!!
الموضوع ما حبسش هنا، الزوجة ديال مدير الوكالة الحضرية تا هيا تورطات فالفيلم و مهندس عقاري فالجماعة سميتو سمير تا هو مشا فيها.
السي خاليد تحكم اليوم إستئنافيا و نهائيا بعشر سنين د الحبس، و مراتو خمس سنين د الحبس و المهندس تا هو خمس سنين.
و حكمات المحكمة كذلك بتعويض للمنعش قدره 936 مليون سنتيم، طبعا فلوس الرشوة رجعوا ليه ديجا.
و ربعين مليون سنتيم اخرى لفائدة شركة اخرى تا هيا خذا من عندها الرشوة هو و المهندس.
هادي خدمة نقية و فالمستوى و كتبين أن الدولة عندها إرادة في محاربة الفساد، لكن ياريت لو الدولة تزيد تنبش فالناس اللي الفوق، و تكون عندها الجرأة تشوف فملفات ديال شخصيات مهمة نافذة، غادي تلقا العجب العُجاب.
