البوليس الاسباني شدو الخميس الفايت جوج مغاربة من اللي حرگو فمطار بالما ومزال كيقلبو على 4 أخرين ما معروفش فين غبرو. هاذ الجوج تشدو فبلدية إنكا فجزر البليار شرق إسبانيا.
ذكرت تقارير اخبارية، أن المتهم اللي تسبب فالنزول الاضطراري للطيارة، صدر تقرير طبي أكد انو ما كيعاني من أية مضاعفات ناتجة عن اصابته بمرض السكري كيف ما قال داخل الحبس، كما افاد اطباء الطوارئ قدام المحكمة بصفتهم شهود، أنهم مني طلعو للطيارة لقاو فمو بيض ورجليه متيبسين واعتقدو بشكل كبير انها أزمة سكري لكن من بعد جاتهم شكوك حول الوضع الصحي للمتهم.
وعرف مطار بالما دي مايوركا، الشهر الفايت، حادثة غريبة بعد توقف اضطراري لطيارة تابعة لـ”العربية للطيران” كانت غادية لتركيا وتوقفات باش تعطا الإسعافات لشاب عندو 23 عام دار راسو عندو السكر وجاتو غيبوبة.
هاذ الظرف خلات أكثر من 20 مغربي يستغلو الفرصة وسوء الأحوال الجوية يضربوها بحرگة، لكن البوليس والحرس المدني شدو بعد ايام البعض منهم.
