عاقب الاتحاد الإفريقي لكرة القدم الدولي المغربي سفيان أمرابط، ووقفو بسبب البطاقة الحمرا اللي كان خدا فماتش جنوب إفريقيا ضمن ثمن نهائي كوب دافريك “الكوت ديفوار 2023” فيناير الماضي، وبدات الجامعة الملكية المغربية لكرة القدم الإجراءات ديالها لاستئناف العقوبة المسلطة على اللاعب، خصوصا وأن ليكيب ناسيونال عندها استحقاقات مهمة وأمرابط لاعب مهم وأساسي فصفوف الأسود.
وحسب مصادر مطلعة فاللجنة التأديبية ديال الاتحاد الإفريقي لكرة القدم عاقبت النجم المغربي سفيان أمرابط، ووقفاتو 2 ماتشات مايلعبهومش بسبب الطرد اللي كان خدا فالماتش ضد جنوب إفريقيا، وهو الماتش اللي كان سالا بإقصاء المنتخب المغربي من ثمن نهائي كأس افريقيا بالخسارة بنتيجة 2 لزيرو.
نفس المصادر وضحات، أن الجامعة الملكية المغربية لكرة القدم، قررت استئناف عقوبة الاتحاد الإفريقي للعبة المسلطة على سفيان أمرابط، وطالبت الكاف تخفيضها من التوقيف 2 ماتشات إلى ماتش واحد.
وفي انتظار قرار الاتحاد الإفريقي لكرة القدم فسفيان أمرابط ما غيلعبش مع المنتخب الوطني المغربي جوج ماتشات الجايين فالإقصائيات المؤهلة إلى مونديال 2026، فشهر يونيو الجاي، والماتش الأول غيكون ضد زامبيا والثاني ضد الكونگو، واذا وافق الكاف على تخفيض العقوبة وهذا الشيء ممكن بزاف حيث تدخل أمرابط اللي خدا عليه الحمرا كان تكتيكي باش يوقف اللاعب الخصم، وما داخلش فالتدخلات اللا رياضية، فغيكون اللاعب حاضر مع الأسود فالماتش الثاني.
