أكد النجم المغربي إبراهيم دياز لاعب ريال مدريد الأسباني انه اختار يلعب للمغرب عن قناعة، وماشي حيث إسبانيا ما عيطاتش له، ونفى واش حاول يدير الضغط على الصبليون باش يعيطو ليه للمنتخب الإسباني.
وفحوار دارو إبراهيم دياز مع موفيستار فوتبول الإسباني، كشف إبراهيم دياز على حيثيات اختيارو للمغرب وقال: “ما درت حتى ضغط على الصبليون، أنا كنحس براسي إسباني 100% ومغربي 100%”.
وكمل إبراهيم دياز: “المغرب وإسبانيا عطاوني حب كبير وبجوجهم بلدان زوينين، كبرت فإسبانيا والجذور ديالي مغربية”.
ونفى إبراهيم دياز واش انه كان كيتسنى اسبانيا يعيطو ليه يلعب معاهم، وأكد انه مقتانع باختيار المغرب، وقال: “حسمت القرار ديالي، وما فكرتش واش إسبانيا غيعيطو ليا باش نحسم هذا القرار، أنا ديما كنختار بقلبي وعندي أحلام بسيطة والطريقة باش تعاملو معايا المغرب والمشروع اللي قدموه ليا مزيان ليا وبزاف”.
