هسبريس، اللي كيعتابر نفسو الموقع الأول في المغرب بالطرافيك واللي شبعان فلوس ديال الدعم العمومي وإشهارات ديال مؤسسات عمومية، كيدعم جبهة البوليساريو بالعلالي وما داير اعتبار لا دم الشهداء ولا التضحيات ديال العسكر ديالنا ولا الاستثمارات في الأقاليم الجنوبية.
جبهة البوليساريو ما نساتش ليه الخير ديالو وقامت برد التحية، وهللت وزغردت للتغطية اللي قام بها الموقع، لما يسمى بمؤتمر الجبهة الإنفصالية بمنطقة تيفاريتي الواقعة بالمنطقة العازلة واللي ممنوع أصلا يدخل ليها شي حد بقرار ديال الأمم المتحدة.
البوليساريو ما قداتها أرض من اللي قرات مقال ديال هسبريس وفرحانة بزاف بالروبورطاج للبلاصة اللي تقام فيها المؤتمر، واعتبرات الناطقة باسم المرتزقة النانة لبات الرشيد، أن هاذ العمل الصحفي رائع وما حشموش موالين الموقع وهم كينشروا أعلام الانفصاليين.
الموقع اللي محسوب على المغاربة اللي كلهم ضحاو من أجل الصحراء نقل مقطتف من كلمات الإرهابي إبراهيم غالي اللي تكلم على الشعب الصحراوي والكفاح العادل، وكثير من المصطلحات اللي حاول الموقع يروج ليها.
وشكك الموقع في موقف المغرب من هاذ النزاع في حين أكد على موقف البوليساريو من تيفارتيتي اللي كتعتبرها منطقة محررة. وراه ماشي المرة الأولى اللي كتقوم هسبريس بهاذ الفعايل ديال الخونة، اللي معروف شكون كيدفع ليها الأجر.
