باتريس بوميل، جابوا المدرب السابق رونار كمساعد و معد بدني، و سنا مع الجامعة عقد لأربع سنوات مقابل 55 مليون سنتيم شهريا.
مشا رونار ضبّر على راسو فالسعودية و بقا هو هنا، خلاّه لينا، لأن العقد ديالو ما فيهش شرط جزائي، فا عطاه لقجع رئيس الجامعة يشدّ المنتخب الأولمبي كمدرّب.
كي شدّو تقصا معاه من الدور الأول فالتصفيات الإفريقية المؤهلة للألعاب الأولمبية.
هاد باتريس بوميل اللي ما عمرو كان فحياتو مدرب أول لشي فرقة، من شهر تسعود اللي فات و هو جالس و كيشدّ خمسة و خمسين مليون كل شهر فالفيلا الراقية ديالو اللي عطاتها لو الجامعة فمراكش.
عاطيها غا للمساريات و تسلق الجبال و أكل ما لذ و طاب من الشهيوات المغربية، كيصور داكشي و كيلوحو لينا نشوفوه فالإنستغرام ديالو.
باتريس بوميل هو دابا ثاني أغلى عاطل فالعالام، كيتخلص على الشوماج و ساكن فابور و المازوط فابور و الكاط كاط فابور فبلد باقي بنادم كيتزاحم فيه بالألاف فصالونات الشغل من الفجر باش يدفع السيفي ديالو لخدامي ديال 2500 درهم فالشهر فشركات فرنسية منين جاي هاد المدرب العالمي باتريس بوميل.
