كاين لي تيقول حنا غا ظالمين العرايشي وتنديرو حملة عليه باش نهرسو ليه المستقبل ديالو..
حنا أصلا متنعرفوش كاع هاد العرايشي في الوجه ومعندنا معه حتى مشاكل. فقط الغيرة على البلاد لي تدفعنا نكشفو الفساد المتعشش في القمطر التلفزي المغربي.
وزايدون حنا ماشي من الصوحافة لي تيديرو الابتزاز بحال شي مواقع شريتوا مولاها. اما خدمتو ليه مراتو أو عطيتوه شي عظم يمصو..
حنا ربي مقنعنا على اللهطة لي ولات سيدة الموقف والمجلس.
ويلا بقينا صاقلين راه الضربة غادي دجي من برا وتولي القضية فيها لعب كبير… اللهم خماجنا يبقى عندنا، وملي تنكشفوا شي ملف عوض يمشي حسراف أو حشلاف يقاد لينا الضربة سير جمع راسك وقاد امورك لان الملفات لي مزال كاينين عندنا فيهم أنت بالضبط وصحابك في النوقابة…
فيصل العرايشي الرئيس المدير العام ديال الشركة الوطنية للإذاعة والتلفزة أطلق واحد المباراة عجيبة وغريبة لتوظيف شخص واحد داخل قناة السادسة في مهمة مراقب بمصلحة البرمجة تتعلق بفحص البرامج الجاهزة للبث سواء كانت برامج من إنتاج داخلي أو خارجي.
العجب الأول فهاذ المباراة هو أن الإعلان عليها وعلى شروط اجتيازها مكتوب باللغة الفرنسية لي ماشي هي اللغة الدستورية ديال المغرب.
والعجب الثاني هي أنها خاصة فقط بالمترشحين لي عندهم إجازة فالشريعة وفالدراسات الإسلامية واخا مطلوب من المترشح تكون عندو مؤهلات تكنولوجية عالية .
هاذ المباراة دازت البارح الخميس 29 نوفمبر. دوزوها عشرة ديال الأشخاص. 8 تيخدمو داخل القناة و 2 من خارج القناة..
من بين هاذ 2 لي دوزو المباراة من خارج القناة كاين واحد الشخص الأخت ديالو رئيسة مصلحة فهاذ القناة.
يعني النتيجة باينة للعمى. المشكل هو أن الإعلان عن المباراة تيقول بأن المترشح خصو يكون عندو خبرة ديال عامين فنفس الوظيفة.. نشوفو آسيدي شنو المواصفات المطلوبة فهاذ المترشح لي عندو إجازة فالشريعة أو فالدراسات الإسلامية باش ينجح فالمباراة لي فيها فقط اختبار شفاهي..
المطلوب آسيادنا منو حسب شروط اجتياز المباراة يضمن الجودة التقنية والأخلاقية ديال البرامج. ويفحص الأشرطة الأصلية ديال البرامج الداخلية والخارجية لي كتكون موجهة للبث فالقناة السادسة، ويضبط الاختلالات التقنية لي فيها سواء فالصوت او الصورة. ويحدد فهاذ الأشرطة المشاهد المخلة بالأخلاق أو بالدين أو لي تتخدش بالحياء العام ديال المشاهدين ويحذفها.
يعني يكون مراقب عندو سلطة ويدير ما بغى حيت هو تبارك الله عليه عندو إجازة فالشريعة وفالدراسات الإسلامية.
و خص هاذ المترشح تكون عندو كفاءات وقدرات أخرى خاصة. خص تكون عندو قدرة على الحفاظ على التركيز التام ديالو من الناحية السمعية والبصرية منين يكون تيراقب البرامج ويبقى محافظ على الحس النقدي ديالو.
وخصو يكون عندو اهتمام كبير بالقضايا ديال العصر وبالقضايا الاجتماعية. ومن الناحية العملية خصو يكون تيتحكم فالخصائص التقنية ديال إشارات الفيديو والأوديو سواء كانت عندها طبيعة رقمية أو تناظرية. وخصو يكون بارع فالفهم والتأويل ديال جودة الصورة الموجودة فالشاشة المضبوطة بطريقة جيدة من ناحية الإضاءة واللون والكونتراست، وتيفهم مزيان فالتأويل ديال جودة الصورة لي تتكون مرسومة بجهاز الذبذبات، وفالتأويل ديال جودة الصوت من خلال جهاز قياس المستوى والفاز، ويكون عندو كذلك قدرات ومؤهلات فمجال المونطاج.. الأخ ديال السيدة المسؤولة فمصلحة البرمجة فالقناة لي اجتاز الكونكور ما يمكنش بطبيعة الحال تكون عندو هاذ القدرات العجيبة، وما عندوش أصلا خبرة ديال عامين فشي وظيفة من هاذ النوع، لأنه يالاه سالا سطاج.. إيوا جمعو راسكم معانا يا المخلوضين. ومنين تبان النتيجة غانشوفو شكون غاياخذ هاذ البوسط لي مولاه خصو يكون عالم وفقيه وعبقري فالتكنولوجيا السمعية البصرية.
