أصحاب قنوات اليوتوب:مكتب الصرف باغي يعرف شحال كتدخلو دلفلوس من خارج المغرب

بدا مكتب الصرف هذه الايام كيصيفط لصحب القنوات ديال يوتوب، اللي كيجمعو الفلوس من ادسنس بلا ميكشفو على حجم الارباح ديالهم ، يعني اللي كيتهربوا من اداء الضرائب على المداخيل ديالهم ..

ولقى مكتب الصرف بأن هاذ المحتالين، قدموا خدمات لاطراف ف الخارج، بلا ما يصيفطو للمكتب ملخص هاذ العمليات طبقا للمقتضيات ديال القانون وخاصة المذكرة العامة ديال عمليات الصرف اللي صدرت نهار واحد يناير 2019، واللي حالهم عليها مكتب الصرف.

مكتب الصرف طلب من صحاب القنوات ديال اليوتوب، اللي كثرو بزّاف هذه السنين الاخيرة واللي كل واحد فيهم كيلغي بلغاه، باش اوجدو واحد الضّوصي قبل مايفوت شهر ديال الاجل، واللي فيه لاكارط ناسيونال ديال مول القناة، والشهادة ديال التسجيل ف السجل التجاري، ورقم التعريف الضريبي ولّا بطاقة المقاول الذاتي..

هاذ اليوتوبورات خاصهم اعطيو لمكتب الصرف ملخص ديال العمليات اللي قاموا بها للخارج، زعما الخدمات اللي قدموها من خلال هادوك الفيديوهات ديالهم، من 2016 حتى ل 2018، وصيفطو للمكتب عاوتاني، وثائق ثبوثية على الخدماتى اللي قدموها للكليان ديالهم اللي هما “Google Ireland Limited”، أو “Unity Technologies” وكيفاش تعاملوا مع هاذ الشركات اللي كايصيفطو لهم لفلوس..

المهم من هادشي هو ان مكتب الصرف عاق بهاد عباد الله اللي شوهونا في العالم واللي مالقى مايدير كينوض كيبقى يصور ف الفيديوهات اللي اغلبيتم تافهين وخاويي مّاليهم، وكاين فيهم اللي دار شي فيديوهات شوهة وماكايحتارمو لا اخلاق لا دين لا ملّة، المهم ف سبيل لفلوس وجميع الجيمات والمتتبعين هاذو مستاعدين ابعو شرفهم واعراضهم..