شركة “ايماج فاكتوري“، لي كنا جبدنا ليها لمصران، ولي محسوبة على فيصل العرايشي مول التلفزيون بدار البريهي، هادي شهرين وهي تتصور شي برنامج صباحي قاليك فيه 200 حلقة.
وكل حلقة فيها 52 دقيقة، فيها بزاف ديال بلا بلا بلا بلا يعني خاوي داوي… كل حلقة غادي تكلف بوحدها 25 ألف درهم، بالسلامة اش غادي تقدم للمغاربة…؟.
وقاليك أسيدي هاد الصباحيات لي غادي تنتجهم شركة “ايماج فاكتوري” المحسوبة على العرايشي عندها عقدة مدتها ثلاث سنوات، وقابلة عاد للتمديد، أراك ما تبرع في الميزانيات..
اجيو معنا نديرو حساب العكايزات… 25 ألف درهم ضربها في 30 يوم جات اسيدي ب 75 مليون في الشهر ضربها في عام…جات اسيدي 900 مليون… ضربها في 3 سنوات جات اسيدي 2 منيار و700 مليون… بصحتك اسي العرايشي انت بوحدك لي مغربي قح…
كيفاش وقع… الشركة ديال التلفزة دارت واحد طلب عروض زعما من أجل التمويه وصافي، دخل للمنافسة جوج شركات وحدة اسمها عليان لصاحبها نبيل عيوش الصديق الحميم للعرايشي، ودخلت شركة العرايشي ايماج فاكتوري… ولأن الصفقة غليضة انسحب عيوش، ومقابل هاد الانسحاب ديالو خدا مشاريع اخرى بحال شي سيتكومات، وشي لعيبات صغار يربح فيهم شي مناير حتى هو.
شفتوا فين وصلنا مع هاد العرايشي وصحابو…
