الشركة لي من نهار تأسست وهي تتضرب يدها حتى للقاع فالميزانية ديال تنفيذ إنتاج برامج تلفزيون العرايشي هي إيماج فاكتوري Image Factory. هاد الشركة لي تتحقق أضخم رقم معاملات فكل عام من ميزانية التلفزيون المغربي مقابل تنفيذ إنتاج برامج ومشاريع للقناة الأولى والقناة الأمازيغية، تيقولو الخبراء فالإنتاج بأن الأعمال لي تتقدمها فالتلفزة ما يمكنش تكون تصرفت عليها حتى النصف من الميزانيات الكبيرة لي تتعطيها ليها لجنة اختيار المشاريع..
هاد الشركة آسيادنا حققت فرقم معاملاتها 22 مليون و 764 ألف درهم بدون احتساب الضريبة على القيمة المضافة، مقابل إنتاج برامح رمضان 2018، وحققت رقم 26 مليون و232 ألف درهم بدون احتساب الضريبة على القيمة المضافة مقابل إنتاجات رمضان 2019، وحققت رقم 14 مليون و 940 الف درهم دون احتساب الضريبة على القيمة المضافة مقابل الإنتاجات ديال شبكة برامج 2019. يعني أن هاد الشركة حققت فأقل من عامين 63 مليون و 936 الف درهم بدون احتساب الضريبة على القيمة المضافة فرقم معاملاتها. وهذا راه مبلغ خيالي وقريب من 6 مليار و400 مليون سنتيم فعامين. ولكن، شكون أسس هاد الشركة؟ وعلاش كتحصد أرباح سنوية خيالية من التلفزيون ديال العرايشي؟.. نرجعو شوية للوراء باش نحاولو نفهمو الأصل ديال الأمور.
فعام 1989 أسس فيصل العرايشي هو و شركاء آخرين شركة ديال الإنتاج السمعي البصري اسمها سيكما Sigma. والشركاء لي أسسو معاه هاد الشركة هما زوج ديال رجال الأعمال لي عندهم دبلومات فتقنيات السمعي البصري جابوها من الميريكان. الأول هو دينو السبتي والثاني هو محمد رزقي.. فيصل العرايشي بقى شريك مع دينو السبتي ومحمد رزقي حتى لعام 1999، وهو العام لي ولى فيه رئيس مدير عام ديال الإذاعة والتلفزة المغربية.. وبطبيعة الحال ما كانش ممكن فيصل العرايشي يكون هو المسؤول الأول على الصرف فالإذاعة والتلفزة المغربية وفنفس الوقت يبقى المالك ديال شركة إنتاج خارجي تتستافد من فلوس التلفزيون. شنو وقع إذن؟ لي وقع هو أن فيصل العرايشي باع النصيب ديالو فشركة سيكما لصديقو دينو السبتي.. ومن بعد محمد رزق الشريك الثالث، خرج من شركة سيكما هو و السيدة هيندا السقال لي كانت المديرة التجارية ديال هاذ الشركة، وأسسوا شركة إيماج فاكتوري.. يعني المؤسسين ديال إيماج فاكتوري كانوا بزوج مسيرين ديال شركة سيكما لي أسسها العرايشي مع دينو السبتي ومحمد ريزقي.. ومن يوم تأسست إيماج فاكتوري عام 2004 وهي تتحصد فالملايير من قنوات القطب العمومي لدلي الرئيس المدير العام ديالو هو فيصل العرايشي.. إيوا الأمور راها واضحة. وعيب شركة وحدة تخدم وتضرب الملايير فالصفقات ديال التلفزيون، والشركات لي ما عندهاش لي يفتح ليها الابواب، تبقى تتفرج من الشرجم فالوزيعة لي تتفرق على الصحاب.
