فيديو ديال مغربي فمركز احتجاز بمدينة هواسونغ بمقاطعة جيونج فكوريا الجنوبية دار الروينة فمواقع التواصل الإجتماعي.
وكيبان فالفيديو اللي مسجل بكاميرا فمركز احتجاز، مهاجر مغربي ويدو مكتفين ورا ظهرو، وراسو مغطي، ورجليه مربوطين حتى هما.
المهاجر المغربي فالفيديو كيبان وهو كيحاول يدخل للطواليط اللي حداه بلا مايقدر.
https://twitter.com/koryodynasty/status/1442877953986097161?s=20
وقال المغربي اللي وصل لمركز الاحتجاز فمارس اللي فات، للتلفزيون الكوري الجنوبي “jtbc”: “ماقدرتش نتنفس. ماعمرني ننسى فحياتي هادشي اللي دارولي”.
ووصف هادشي اللي تعرض ليه بأنه “صدمة حياتو”.
ووصل المغربي لكوريا فأكتوبر 2017 كطالب لجوء. وتم إرسالو لمركز التوقيف فمارس 2021، بعد صدور أمر بطردو.
واحتج على ظروف اعتقالو وطلب الحصول على علاج طبي للأمراض العقلية والجسدية اللي عانى منها، ولكن طلباته قوبلت بالرفض.
وحسب ماذكر موقع “كوريا تايمز”، الشاب المغربي تدار فالحبس الانفرادي 12 مرة، ودوز ثلث وقتو فالمركز فزنزانة مساحتها 10 أمتار مربعة.
وقالت جمعية قانون المصلحة العامة، اللي علنات أنها قدمت التماس إلى وزارة الدفاع الكورية: “قدمنا تفاصيل القضية لفريق الأمم المتحدة العامل المعني بالاحتجاز التعسفي ولجنة مناهضة التعذيب التابعة للأمم المتحدة. وطالبت بالإفراج الفوري على المهاجر المغربي.
وقالت الحكومة الكورية انها اتخذت “الحد الأدنى من الإجراءات لضمان سلامته”. وتابعت أنها فتحات تحقيق، ولكن زادت ان الشخص المعني “حطم منشآت بحال الجعاب ديال الما، والشراجم والطواليطات، وعرض العاملين فالمركز للاعتداء.
