حكمات محكمة فتركيا بحبس واحد السيد لمدة عامين، بسبب المزاولة ديالو لمهنة التطبيب بلا ترخيص، وفرضات عليه غرامة يعطيها لشخص تسبب ليه فأضرار خايبة.
على حساب ماقالت الصحافة التركية، فهاد السيد دار راسو طبيب ديال الأسنان وجاوب فالتيليفون على المكالمة ديال واحد الرجل ناضت عليه الضرسة بالليل وعيط للطوارئ.
مللي وصل المريض عند المتهم، بدا كيعيق عليه كيقول ليه راه أستاذ كبير في كلية الطب ديال الأسنان في تركيا، ومن بعد ما دار راسو كيقلبو قاليه خاصك تحيد السنان الربعة القداميين كلهم.
ومن بعد ما قاليه المريض بأن 4 ديال السنان بزاف، جاوبو وهو غاضب: واش توريني خدمتي؟ باش يزرب عليه.
القضية غادي تفرش مللي مشا المريض للصيدلية باش ياخد الدوا لي عطاه، ولكنها رفضات تعطيه ليه حيت مافيهش الكاشي ديال الطبيب.
ومن بعد ما رجع للعيادة لقا الطبيب الحقيقي، ومللي قاليه سميتو، قاليه هذاك غير عامل النظافة لي كيجي بالليل للعيادة.
