شب حريق فمخيم واد درعة لي دار فمصب واد درعة غرب طانطان.
وحسب مصادر محلية فطانطان، العافية لي شعلات فظروف غامضة، كلات خيام كانت مخصصة لضيوف الموسم ديال الموكار لي كيتنظم دابا فطانطان.
وحسب المصادر ذاتها، فالعافية لي شعلات ماخلفاتش ضحايا ولكن كاينين خسائر مادية كبيرة، وحتى البروكرام ديال الموسم بقى متواصل ولكن الفقرة لي كاينة فمصب واد درعة تحيدات.
المصادر قالت بلي الوقاية المدنية والجوندارم ومسؤولين فالمدينة دطانطان مشاو لعين المكان ودارو معاينة للخسائر، وكاين تحقيق أمني لمعرفة أسباب هاد الحريق لي باقة مجهولة.
