البوليس ديال مكناس شد واحد الدري عنو 18 لعام، حيت شتابهو فيه عندو علاقة بقضية محاولة سرقة وكالة تحويل الأموال.
البلاغ ديال البوليس قال أنهم توصلو بشكاية امبارح فالصباح من مسؤول عن وكالة تحويل الأموال اللي تتبع لواحد البنكة، المسؤول أكد للبوليس ان الوكالة تعرضات لمحاولة السرقة، قبل ميوصل البوليس للشاب المشتبه به.
المشتبه به حسب ما قال البوليس دخل للوكالة فالليل من بعد ما هرس الزاج ديال الباب.
المتهم الآن تم الاحتفاظ به تحت تدبير الحراسة النظرية رهن إشارة البحث القضائي اللي تيجري تحت إشراف النيابة العامة المختصة، وذلك للكشف عن جميع ظروف وملابسات هذه القضية.
