وزير الثقافة والشباب والرياضة الناطق الرسمي باسم الحكومة، عوّال يرجّع الأمور إلى نصابها القانوني ويصلح الوضع داخل لجنة انتقاء مشاريع الأعمال التلفزية ديال الشركة الوطنية للإذاعة والتلفزة، بعدما فاحت ريحة الفساد بطريقة خايبة وكريهة من وسط هاذ اللجنة، واتضح بالملموس وبالدلائل والبراهين أن رئيسة هاذ اللجنة إلهام هراوي هي والأعضاء الداخليين للي تيشتغلو معاها فالشركة دايرين ما بغاو، وتيعطيو ملايير السنتيمات للشركات بدون حسيب ولا رقيب، وتيسمحو لهاذ الشركات تنفّذ بفلوس المغاربة إنتاج أعمال رديئة، من بينها مسلسلات ميزانياتها ضخمة وتترسّخ داخل المجتمع مجموعة ديال العادات الخايبة والسلوكيات المنبوذة وتتعتبرها حاجة طبيعية بحال الخيانة الزوجية، وإساءة الأبناء والبنات لوالديهم من خلال كلام خايب وغير مقبول أخلاقيا، الشي للي كيأثر سلبا على الأجيال الصاعدة، والدليل على ذلك مسلسل الدنيا دوارة للي كانت هاذ اللجنة اعطات مليار ونصف لشركة ديسكونيكتد باش تنتجو، وللي بان بعد العرض ديالو فالقناة الأولى أن كلفة الإنتاج ديالو ما يمكنش تتجاوز خمسميات مليون على أكثر تقدير، وللي السيناريو ديالو فارغ وما فيه حتى فائدة، والأبطال ديالو كيمارسو الخيانة الزوجية على أساس أنها سلوك عادي وطبيعي ومبرّر اجتماعيا وأخلاقيا، بالإضافة إلى مسلسلات وسيتكومات أخرى بملايير السنتيمات اعطاتها رئيسة اللجنة والأعضاء للي معاها لشركات مقرّبة من العرايشي بحال إيماج فاكتوري وعليان ديال نبيل عيوش، للي غانرجعو فيما بعد للكوارث التلفزيونية للي تسببو فيها للمغاربة..
الوزير عبيابة عندو ممثل ديالو فالمجلس الإداري ديال الشركة الوطنية للإذاعة والتلفزة. وهاذ المجلس الرئيس ديالو هو فيصل العرايشي للي غايعقد فالأيام القليلة المقبلة اجتماع ديال المجلس بحضور جميع الأعضاء بمن فيهم ممثل قطاع الاتصال التابع لوزارة الثقافة والشباب والرياضة. وهاذ المجلس غايأشّر على نتائج أعمال لجنة انتقاء المشاريع، وغيعطي رأيو فالمحاضر للي توصل بيها من هاذ اللجنة، وهي المحاضر الخاصة بالمشاريع للي اعطاتها اللجنة للشركات للي غاينفذو إنتاجات ديال القناة الأولى والقناة الأمازيغية وقناة العيون الجهوية.. وفنفس الوقت غايتقدم العرايشي أمام المجلس الإداري بتجديد الثقة فأعضاء اللجنة للي حتى واحد ما خافية عليه الممارسات ديالهم بما فيها الرئيسة والأعضاء الداخليين للي تابعين ليها..القانون واضح. ما يمكنش أعضاء يبقاو خالدين داخل أي لجنة كيف ما بغى يكون نوعها.. أعضاء الحكومة وتيتجددو ويتغيرو فأجل أقصاه خمس سنوات.. وراه الحماق ان أعضاء هاذ اللجنة يبقاو مستمرين في هاد العشوائية ديالهم لمدة تفوق أربع سنوات.. عبيابة من بعد ما تعيّن وزير مسؤول على الثقافة والشباب والرياضة وقطاع الاتصال رفع شعار محاربة الفساد والريع وخدمة البلاد وفق معايير القانون والكفاءة والشفافية، عوّال ما يسكتش على هاذ الشي للي تيوقع داخل اللجنة منذ ما عيّن العرايشي إلهام هراوي رئيسة عليها هاذي خمس سنوات.. السيدة عندها وظيفة أصلية على رأس وكالة الإشهار ديال الشركة الوطنية للإذاعة والتلفزة، وما قادراش تمارس وظيفتها الأصلية بكفاءة وكتب المجلس الأعلى للحسابات عليها تقرير خايب بسبب سوء التسيير والتدبير.. إذن خصها تخوي السيكتور هي والأعضاء للي فاتو أربع سنوات معاها داخل اللجنة، وتمشي تقابل شغالاتها فالإشهار.. وهاذ الشي للي من المنتظر يطبقو الوزير عبيابة في إطار محاربة الريع والفساد داخل التلفزيون ديال المغاربة..
الواضح ان عبيابة عوال كما قلنا على محاربة الفساد والزبونية وقلة الحيا في البرامج التلفزية وفي نفس الوقت خاص يحتاط من واحد اللوبي غليض وعريض عندو شبكة ديال المواقع الالكترونية والجرائد الورقية لي واكلة من الطنجرة ديال الفساء التلفزي، وهي لي شنات عليه حرب ظالمة مباشرة بعد توليه المنصب الوزاري.
من جهتنا غادي نمدو يد الله مع هاد الوزير وخا متنعرفوه متيعرفنا، ولكن شمينا فيه ريحة لبلاد وريحة الاصلاح وريحة محاربة الفساد.
معندك مناش تخاف اسي عبيابة طحن الفاسدين لي هلكونا وهلكوا الشعب حتى ولاكلشي خارج للزناقي والشوارع وضربو بنا الطر في اليوتوب.
