ابراهيم مبشور
بالنسبة للألعاب الأولمبية، ما فيها باس نعرفو بلي عدنا 50 جامعة رياضية، وحدة فيهم للي خدّامة على طول العامة هي جامعة كرة القدم و الدليل أنها جابت مدرب تيتوفر على طاقم مساعد فيه 10 المسؤولين وباقي الزغبي واحل ف 2 أظهرة ما لقاهومش، زوج اظهرة للي نقدرو نتقصاوْ بيهم فالربوع عوض نطيرو من المجموعات
وحتى ملي تيكونو عدنا رياضات أولمبية فيها شوية الضو فما تتعدّاش ألعاب القوى و البوكس.
بعض من الجامعات ( غير كمثال) للي تتعرفها غا وزارة الشبيبة وعمرك سمعتي عليها شي تورنوا…. كاين أسيدي:
جامعة المسايفة، للي فاز بالرئاسة ديالها محمد الفرّاع، مباشرة من بعد ما سالى التحقيق معاه فمحكمة الجنايات بتهمة تبديد 117 مليار سنتيم من أموال تعاضدية موظفي الإدارة العمومية، كانو تيتسناوه يتشد، الساعة تسيّف عليهم و شد المسايفة… هو فالحقيقة، السي الفرّاع، كانو يصاوبو ليه شي جامعة ديال ” افريع ” خزينات الدولة…أنا واللاهما اعرفت علاش امخلين كازا و سلا للي تتزخر باصحاب السيوفة و تيعَولو على المراعيد يجيبو ليهم الميداليات
كاينة أسيدي جامعة الكريكيت ( لا علاقة لها بالزاوية الكركرية ) هاد الجامعة تتسيرها غير لجنة مؤقتة، العام الفايت رئيس اللجنة المؤقتة من كثرة الملل، قدم استقالتو حيث ما وفرو ليهم حتى دوك المغارف باش تيشيرو بالكورة ههههههههه، فرقة الفوت طالعة للقسم الأول تاع روشارج اينوي و ما عندهاش تيران بقات ليكم غا الكريكيت.
كاينين واحد 2 جامعات و برب ما اعرفتهوم آش تيديرو: جامعة الرياضات الحضرية و الجامعة المغربية للرياضة للجميع
ولكن الخرية تاع الضحك هي الجامعة المغربية للهوكي على الجليد، بحال ايلا قلتي الجامعة الكندية لسباق الهجن ههههههه، ! هاد الجامعة تأسسات غير ف 2018 و الغريب جل الفرق فيها من الدار البيضا و الرباط، واهمها فريق “الدببة” و فريق “الكابيتلز” ، ما زال كون بانو فرق من افران و ميدلت و باب برد مقبولة، باش يكونو فراقي من مناطق تيعرفو غا التبروري فهذا من العجب العجاب. لكن الطموح ديال هاد الجامعة كبير و قدرات تنظم بطولة افريقية شاركو فيها 5 الفرق: زوج من المغرب و زوج من مصر و وحدة من الدزاير، بلدان ما عند ربها حتى روبيني د الما و باغة تزلك فالثلج….
المهم اللائحة طويلة فهاد العبث الرياضي، باش نكملوه خصنا نديرو عليه 3 نوي بلانش، غير هو خصك تعرف النماذج للي تتسير هاد الجامعات، و الخواض للي تيدور فيها، و الاموال للي تتصرف عليها و الأميين للي مخشيين فالمكاتب ديالها بت انبت و التسركيل على برّا…
في 98 على ما أظن واحد الأمي كان خاشي هبو فهادشي ديال الاعلام الرياضي.. جاب ليا واحد الكمشة تاع الاوراق بالفرنسية، قال لي هادو شي بنود ديال العضوية فجامعة السلة، الله يرحم باك ايلا ما ترجمهوم ليا غا بتصرف. اييييه نترجمهوم ليه بتصرف! حيث باغي يتخشى يدبر على الصرف فالباسكيط باش يزيدها على الكوامل للي تيدبر فلابريس سبورتيف و شوكرا
