شكون هو سعد الدين العثماني؟

تكتب نهار 10 أغسطس، 2020 مع 12:26 مواقف وآراء تابعونا على Scoop

عادل عناب

سعد الدين العثماني، 64 سنة، سوسي من تافراوت، كبر بين إنزݣّـان و كازا، متزوّج من السيدة حليمة صغور و عندو ثلاثة ديال الوليدات، نجم الدين كيقرا الهندسة المعمارية فتوركيا، خولة غير ݣالسة فالدار ماعندها مايدّار، و مروة باقي كتقرا.

وكيف كايعرف الجميع أن ضباط و موظفي الحالة المدنية كانو مكلخين وكايتسببو للناس في أخطاء مادية وجوهرية في صلب رسوم السجلات ، وسعد الدين واحد منهم حيت كتبو ليه الإسم العائلي ديالو في جذر عقد ازدياد “الـعـتـمـانـى” وهو الإسم لي مكتوب في الباك ديالو والدكتوراه والديبلومات ، ولكن هو كايستعمل حاليا الاسم “العثماني” بشكل غير مطابق لمعلومات التعريف الفردية لي في سجل الحالة المدنية حيت الاسم ديالو الحقيقي بالعربية والفرنصوية هو:

سـعـد الـديـن الـعـتـمـانـى

SAÂD DINE   EL OTMANI

سعد الدين كان قرّاي فصغرو، رغم الظروف القاسية ديال لقراية في بلاد الشلوح،

شد الباك علوم تجريبية مزدوجة دورة ماي 1976 من ثانوية عبد الله بن ياسين فإنزݣان، من ورا الباك دار واحد التخليطة عجيبة غريبة، مشى قرا الطب فكازا، و الشريعة الإسلامية فآيت ملّول، بغى يولي فقيه و طبيب فنفس الوقت.

شد الإيجازة فالشريعة الإسلامية أݣادير آيت ملّول عام 1983 بعدما عشّش فيها 7 سنين منها 4 سنين غير ديال ضويبل، و الدكتوراه فالطب العام ف 1986،  وعشّش فيها 10 سنين بعدما ضوبل فيها 3 سنين. من بعد شد دبلوم التخصص فالطب النفسي ف 1994 من المركز الجامعي للطب النفسي فكازا، عاد شد دبلوم الدراسات العليا في العلوم الإسلامية من دار الحديث الحسنية فرباط .

سعد الدين من الناس لقلال و لا واقيلا هو الوحيد فالمغريب اللي ناقش رسالة الدكتوراه ديالو فالطب بالعربية.

الشريعة اللي قرا راه ألف بيها شي كتوبا ونشر العثماني العديد من المؤلفات هي “في الفقه الدعوي .. مساهمة في التأصيل” و”في فقه الحوار” و”فقه المشاركة السياسية عند شيخ الإسلام ابن تيمية”، وشي مؤلفات دينية، هادي دولة ولا زاوية؟ و الدبلوم اللي خدا هو باش خدّام بيه و كبّر بيه وليداتو، من بعد ما فتح عيادة للطب النفسي فحسّان فالرباط، لكن الناس اللي عندهوم مشاكيل نفسية و مشاو عندو، قالو أنه مجرد “راقي عصري” كيبقا عليهم غير بقال الله قال الرسول، وكايقول ليهم نتا خاصك غير توضى و تصلّي فالوقت و غا تولّي لاباس نشاعلاه، نتا غير بدا تقرا القرآن كل صباح و بإذن الله غا تشفى، و دوز لاكيص خلّص جازاك الله خيرا.

سعد  الدين العثماني هو تلميذ عبد الكريم الخطيب و تربية يدّو، كبر فالجماعة الإسلامية و كان هو من الرباعة اللي أسسوا حركة التوحيد والإصلاح و من بعد العدالة و التنمية مع ابن كيران الرميد و الريسوني والآخرون.

نقدرو نقولو على العثماني هو صوت العقل فالبيجيدي و الرجل الحكيم ديال بصاح، باها الله يرحمو كان غا ساكت وصافي ما حكيم ما والو، فتفجيرات 16 ماي 2003 في كازا، كان القرار تخاد فدوائر القرار بحلّ حزب العدالة و التنمية لكن بفضل حنكة هاد الراجل و أدبه و تكوينه السياسي إستطع يكون أفضل محاور لوزارة الداخلية، و إستطع يعبر بحزب العدالة و التنمية لبرّ الأمان.

علاقتو بابن كيران ما عمّرها كانت مزيانة، لأن شخصية العثماني الهادئة و الطيبوبة ديالو و دماثة الأخلاق ديالو كانو كيخلعو ابن كيران، و ما كانش حاملو، كان خايف يسحب منو الأضواء.

سعد الدين العثماني أسوأ وزير خارجية داز فتاريخ المغريب، ما ضربش فيها حتّى عامين صحاح، كون ما كانتش 20 فبراير و تغيير الدستور ما عمّر كانت غا تعطا ديك الوزارة لسياسي متحزّب، وزارة الخارجية كانت ديما من الوزارات السيادية، و مع ذلك المليك ما خلاهش بوحدو جاب ليه جوج حضّايا، الطيب الفاسي الفهري  كمستشار و يوسف العمراني كوزير منتدب فالخارجية.

و كيبقا أسوأ مشهد وقع ليه فاش جات هيلاري كلينطون للمغريب و مشا الفاسي الفهري هو اللي يستقبلها، و اللقطة ديال الجعفري مندوب سوريا فمجلس الأمن، و بلا منساو البريكولات ديال امريكا الجنوبية اللي كان كيمشي ليهم غير العمراني حيت كيتقن الهضرة بالاسبانيولية

ف 2013 فالتعديل الحكومي من بعد ما خرج حزب الاستقلال من الحكومة، ضحّاو بيه مسكين و جابو بلاصتو الفعفعاني صلاح الدين مزوار.

سعد الدين العثماني رجل خجول مكيهضرش بزااف، ما عزيزش عليه الأضواء و الشهرة بحال ابن كيران، فارض إحترامو و مكيحركش البيضة من بلاصتها، قلتي لو وقف يوقف ، جلس كيجلس، ما ݣاد على صداع وماكيدخلش اشبوقات، و من نهار ولى ريس الحوكومة تسلطو عليه الدعاوي ها حراك الريف ها جرادة ها عطش زاݣورة ها حملة الموقاطعة ها الأساسيدة بالكونطراضة، ولكن هاد كورونا جابت عليه ستة و ضامة و مرّغت ليه وجهو في الغيس

العثماني فاش دخلت كورونا مابقاش عارف راسو من ساسو،  قال للناس الكمامة ماشي ضرورية و نصح الناس بلاش مايديرو الكمامة ، ولكن دازت أيام قليلة صدر مرسوم-قانون كايلزّم إرتداء الكمامة تحت طائلة عقوبات جنائية .

المشكل الكبير لي طاح فيه و طيّح عليه الذل هو انه طبيب و ماخاصوش يرتكب خطأ طبي جسيم ماعارفش واش الكمامة كتحمي الفيروس ولا لا، و لكن العيب ماكيتحملوش العثماني ، العيب كتحملو كلية الطب كازا لي قرا فيها ، ولي خاصها بناءاً على خطأ طبيب خريج ديالها ، خاصها تسد و تعتذر.

سعد الدين العثماني عايش في ڤيلا فاخرة فحي السلام فسلا، حدا ڤيلا عبدالسلام ياسين ديال العدل و الإيحسان، عندو عيادة فالرباط ديال الطب النفسي كيدوّز ب 8000 ريال و خاصك تشد رونديڤو، و عندو مختبر للتحليلات الطبية فآيت ملّول يحمل إسم مختبر العثماني و مقابلو ليه خوه، و راك عارف لابوراطوارات شحال كيدخلو بلا منهضر.

سعد الدين العثماني فنهاية التسعينات كان كيقدم برنامج وقائع فدوزيم مع سمية المغراوي كمُحلل شخصيات المجرمين، بداك البرنامج تشهر وتروجات عندو القضية فالعيادة ديالو. ولكن من نهار ولى رئيس الحوكومة دوك المرضى ديالو كلهم تشتتو مع مابقاش كايجي للعيادة ومابقاش متبع الحالة ديالهم.

سعد الدين خدم طبيب في سبيطار الحمّاق ديال برشيد لي مشهور بـ 36 ، هو نائب برلماني من 1997 يعني من ديك الوقت و هو كيشد ربعة دلميون فالشهر،  راجل ما فكرشوش لعجينة وما كيدخلش شبوقات و مصادر الثروة ديالو معروفة، على المستوى الإنساني رائع و فمنتهى التخلق و الإحترام، سياسيا ضعيف بزااف و كون ما حزب العدالة والتنمية كون مات ليه الحوت شحال هادي حيت ما عندوش ديك الكاريزما السياسية اللي يقدر يجيب بيها الأصوات.

العثماني فاش كان كايقرا في كازا كان ديما ملي كايكون شاد الطريق راجع للشلوح، كاينزل من الكار (نقل الهلال) مع 7 عشية فسبت ݣزولة و يضرب الطاجين ديال اللحم بالبصلة والزبيب عند مبارك مول الطواجن خو عبّاس لي كان مكلّمها ديك الوقت.

سعد الدين كيهضر بالشلحة والعربية و الفرانصوية فقط.