لبارح الصباح دارو واحد البرنامج نشطته الزميلة المجتهدة ايمان ايغوتان فقناة ميدي 1، الموضوع ديالو غريب على المجتمع المغربي هو سلخ وتعنيف الرجال من طرف زوجاتهم.
البرنامج جابت ليه واحد السيد اسمه بهجاجي رئيس شي جمعية للدفاع عن الرجال ضحايا عنف الزوجات، وشي رئيس جمعية أخرى رئيس ضحايا العنف النسوي على الرجال ، وزادت معهم شي طبيبة نفسانية ..
بهجاجي قال بانه تتوصلوا ازيد من الف شكاية في الشهر وعندو حالات بالدليل والفيديو والشواهد الطبية ديال رجال بالموسطاش مضروبين للرأس وواحد مهرس من دراعو، وآخر ضرباتو مراتو بنص جابتو سيس ضوص مشا خيط سبعطاش غرزة في الراس .
والطبيبة النفسانية حكات شي أمور عجيبة كاين لي تيجي عندها باش يدوز لمراتو ملي تتشدو بوحدو تهضر معه تيطيح يبكي ويشكي ويوريها الكدمات ديال التعنيف ديال المراة ديالو.
وقالت الطبية كاين المرأة لي متتنعس مع راجلها حتى يخلص.
هاد البرنامج خاصكم تشوفوه ضروري ومؤكد لسبب بسيط غا باش تعرف السبب اللي تيخلي هداك لي تتلقاه بالمرسيديس الصباح غادي بالدراري للمدرسة ملي يوقف في الضو الأحمر يخنزر فيك ويقدر يسبك بلا سبب.
بهجاجي قال باللي هذ الموضوع مابقاش الرجال تيسكتو عليه ما بقاش حشومة فالمجتمع ولاو تيخرجو ويقولو أنا كليت لعصا من عند مرتي، وحالات العنف المسجلة فـ2018 وصلات لـ 3000 حالة، أي أن ما بين 20 إلى 25 في المائة من الرجال تيتعرضوا ديما للعنف من طرف عيالاتهم، والنسبة مرشحة للارتفاع.
كاين بزاف ديال مظاهر العنف اللي تيتعرض ليه الأزواج من طرف عيالاتهم، كيما قالو المشاركين فجلسة “أزمة حوار”، أن العنف الجسدي تيجي على رأس هذه الأنواع، من موراه تيجي العنف القانوني، الناتج عن المعاناة من مدونة الأسرة، خاصة الشق اللي تيتعلق بالنفقة بعد الطلاق، وهادالشي دفع “الشبكة المغربية لحقوق الرجال” باش تطالب بالتغيير ديالها.
ومن بعد تيجي العنف النفسي، المتعلق فظاهرة الخيانة الزوجية، والابتزاز الجنسي، الجمعية استقبلات حالات لرجال تعرضوا للابتزاز الجنسي من عيلاتهم، بمعنى الفلوس مقابل النعاس، وهناك حالات للجنس بالكريدي.
بهجاجي أكد أن الشبكة استقبلات حالات من الخاريج خاصة فرنسا، ايطاليا، وأمريكا، وتيبقى العنف منتشر فالأسر المغربية، وهو راجع للتربية والبيئة والمحيط اللي جاي منه الراجل والمرا.
تفاصيل أخرى فهذ الفيديو:
