أنا ملكي وغادي نبقى ملكي وعاش الملك

تكتب نهار 10 يناير، 2020 مع 11:47 مجتمع تابعونا على Scoop

موحى البوهالي

بزاف  د  الاصدقاء كيسولوني واش انت معانا ولا مع غانا ..

انا منكم ومعاكم وعندي كذلك افكار لمستقبل هاذ البلاد والعباد اخوتنا واحبابنا اعيشوا في هناء وسرور خوت ..واهزوا العلام وازيدوا للقدام ..

انا قلت من طبعي ديكتاتوري صارم ولكن بحال الجابون والشينوا الصرامة في الجد والعمل والسيرة الحسنة ماشي ديكتاتورية ديال بول البعير ..لدرجة انني مع المساواة بين الرجل والمراة حتى ف الارث وتعدد الازواج .. غا تضحكوا ولكن زواج المتعة عند الشيعة دعارة مقننة ..ديكتاتورية ستالينية ملحدة بعيدة عن ديكتاتورية قريش وابو هريرة والبخاري وابو تيمية.. ما علانا ..

من جهة النظام فانا ملكي ..وككل المغاربة اللي ما اقبلش احكم عليه حتى شي واحد من اي قبيلة فالمغرب ..والعروي كينبهنا اليوم اننا غادين نرجعوا للقبلية … ولكن ملكي كالانجليز ..رغم ان عقليتي فرنسية معجب بالثورة الفرنسية وبالفكر الحر الفرنسي الالحادي الذي يسخر من كل شيء ويضحك على كل شيء خاصة الذيانات والالهة والرسل والكنيسة ورجال الدين ..

وافضل نمودج المملكة الاسبانية حيث مسموح للجمهوريين بانشاء حزب …ولكن لم يسمح لكتالونيا ان تنفصل عن المملكة ..

افضل حزبا جمهوريا على هذه الاحزاب اليسارية القومية الثورجية او الشيوعية والاشتراكية الاسلامية ..لو سمع بها لنين لتحرك في قبره من هول الصدمة ههههه..

اش بغيتو تديرو جمهورية واجيكم شي بوخروبة ولا شي قدافي ولا شي حفتر ولا شي سيسي ولا شي صدام من اكحل الراس زعري ولا عبدي ولا من ايت سشغروشن …ياك لباس واش احماقيتو …وشكون اقدّ عليها راه زعما النظام عريق في القدم …ومع الظام العالمي الجديد ماريكان هي دركي العالم وما تقبلش اتغير اي نظام فالعالم الا باذنها منذ حرب الكويت ملي طردات صدام رجعات الامير لبلادو  … اقبل الحسن الثاني كان كيخاف على عرشو من بعد محاولات بن بركة والفقيه البصري وتبعوهم العسكر في 70 اعبابو واوفقير والدليمي ..وكيدافع عليه بشراسة ..اما من بعد سقوط جدار برلين وحرب الخليج الاولى افهم ان عصر الانقالابات انتهى واطلق سراح كل السجناء السياسيين وسد تزمامارت ودرب مولاي الشريف واطوى الضوصي …

اليوم تسولني واش انت جمهوري ولا ملكي او تقولي واش انت مناضل ولا عياش …بحال الا سولتيني واش انت رجاوي ولا ودادي ..وعلاش ما اتشجعش الرجاء اولاد الشعب او علاش كتشجع الوداد عياشة …. انا بصراحة ما عندي لا مع الرجاء لا مع الوداد وماشي ملزوم عليّ نكون ديما حمراء ولا ديما خضرة انا ما عندي لون ما ابيض ما اكحل .. او فيه 50 نوع من الرمادي .

بعض الاخوان كيقولك خصك تدافع على القيم والمبادئ وعلى العدل وحقوق الانسان الخ …اش من قيم ومبادئ كتكلم عليهم..واش الملايين اللي عوجاتهم المدرسة والزنقة والتلفزيون بغيت انا نقادهم ونتفاهم معاهم بالمنطق وبالقيم والمبادئ …. لواه ما باغيش نحماق ..نرجعو للمخزن ..انا اشتغلت فالفوسفاط فالادارة فالدار البيضاء كتقني مع كريم العمراني وكنعرف الشادة والفادة وخاصة surfacturation كنت تقني فالتلفون نمشي لاي بلاصة ونذخل لاي مكان فالادارات العمومية والخاصة والفنادق والشركات ..ومن بعد فآخر التسعينات كفنان فالشارع تعاملت مع المخزن من البوليس للمقدم للفرقة السياحية للكوميسيرات للقياد للباشا لرؤساء المجالس للولاية للDag وحتى Dst ..اتاصلوا بي وسولوني فاش المشعل انشر مقال على الرسائل ديالي للامم المتحدة وبان كي مون على بعض الخرائط فالموقع ديالهم ..وحتى الجدارمية والمخازنية وبزاف منهم كانوا اصدقاء .. وشفت وافهمت كيفاش كيخدم المخزن … وبان لي ان كلشي غادي بحقو وطريقو ..

وما بقيتش كنخاف لانني كنعرف ان بلادنا فيها الحرية والديمقراطية وما ديرش ما اتخافش ..واصبحت كنحس بالامان فالمغرب وادّاوتنان اكثر من اي مكان فالعالم … وهذا ما كان

وباش انطلع الدم لشي وحدين غا ندير ليكم بحال مول الجيلي وعاش الملك ..

راه قلت ليكم فالاول راني ملكي