الجزائر.. مهزلة بكل المقاييس

تكتب نهار 14 أكتوبر، 2021 مع 09:25 المغرب الكبير تابعونا على Scoop

هشام شارم

يالله ساليت الحلقة اللي كان كينتظرها الملايين بعد نشرة الثامنة، سقوط خيوط الوهم اللي قال التلفزيون الجزائري أنه كيوثق بالصوت و الصورة و الدليل للمؤامرة اللي إستهدفات الوحدة الترابية ديال الدزاير من 2014 من طرف إسرائيل و المغرب.

تفرّجت فالحلقة كاملة بتركيز شديد و غا نعطيك عزيزي المتابع لملخص، السلطات الأمنية الجزائرية وبالضبط خلية مكافحة الجريمة المعلوماتية كشفات هاد المؤامرة من خلال كروب مغلق على الفيسبوك، سميتو “تامزغا إسرائيل”

سيفطوا واحد من لابريغاد دار طلب العضوية للكروب بإسم أمير بلحيتي، تقبل، دخّلوه، و بقا كيسكريني التعاليق والمنشورات، و كل تعليق كيمشي عند مولاه، كيدخل للبروفيل ديالو يعرف شكون، و كيبّين غي (ping) على ال ip ديالو، كيلقاه إما فإسرائيل و لا فالمغريب.

هوكا تم كشف و إسقاط المؤامرة عن طريق كروب “تامزغا إسرائيل” فالفيسبوك.

إلى الإخوة فالجزائر، المرجو إحترام عقل المشاهدين الذين لا يحملون الجنسية الجزائرية، أي طالب مبتديء في ال cybersecurity  غا يشوف هاد الحلقة غا يموت بالضحك على الجانب التقني اللي حطيتوه من أجل الكشف عن المؤامرة، كروب فيسبوك أ صاحبي و سكرينات وبروفيلات وهمية و ip  من السهل جدا تغييرو بأي virtual machine و vpn.

الإعترافات و الأسلحة و داكشي، تاحد ما يقدر ينفي أو يأكد كلامكم، لأن المتهمين نتوما اللي جبتوهم، و الأسلحة حتى هي نتوما اللي جبتوها، و لا يوجد أي جهة أو طرف ثالث يقدر يقول لينا واش هادو فعلا متورطين فمؤامرة أو هم من الفوج الحالي اللي غا يتخرج فشهر ستة من المعهد العالي للحرف و الفنون المسرحية.

في البرنامج قالوا ان دولة فشمال إفريقيا متورطة و المذيع زعم كاع وسماها المغريب، في حين لا أثر لأي إسم مغربي بان متورط فدوك الدلائل، لا فالسكرينات د الكروب ههههه و لا فتصريحات “المتهمين” .

جاب الله ما حطوش ليا شي سكرين فداك الكروب سيفطاتو ليهم النانة و لا شي زلايجي هنا، أما ماشي بعيد التلفزيون الرسمي الجزائري يديرني أنا زعيم المؤامرة.

خلاصة القول إبتلينا بأنظمة عبيطة ممكن دير أي حاجة فقط من أجل البقاء فالسلطة.