الا بغينا نقضيو على المفسدين و ناهبي المال العمومي.. ها اش خاصنا نديرو

تكتب نهار 31 يوليو، 2021 مع 10:05 في الواجهة تابعونا على Scoop

مع تراكم السنين و التجارب، للي عشناها، نقدر نقول أن الفلوس فالبلاد هي أكبر مفسدة تبلى بيها هاد الشعب التعيس… كاع القطاعات للي ضخات فيهم وديان تاع الفلوس تتعيش وضع كارثي خود غا كمثال 50 مليار درهم للي تحطات فالمخطط الاستعجالي لاصلاح منظومة التعليم و طارت مع الطيور لحد كتابة هاد المنشور حتى واحد من المسؤولين ما كان موضوع مساءلة شكلية و لو من باب ذر الرماد في الأعين و قس ذلك على باقي القطاعات…. و عوض نقلبو فين امشات الفلوس، شكلنا مجلس اعلى للتعليم، من ضمن الاعضاء ديالو مريم بنصالح مولات سيدي علي و عيوش مول الدارجة. شوف غا المبادرة الوطنية للتنمية شحال تخسرات فيها د الملاير و فالأخير فشلات فشلا ذريعا باعتراف الدوائر العليا، و حتى المشروع التنموي الجديد للي بداو بعض الاعضاء فيه تيتكلمو على الاستفاذة من قروض لإنجاح المشروع، تنضن غادي يتنسى قبل حلول 2035 . انا كون جاو من جيهتي و الله لا اخداو شي درهم.. تتخلص و تتاخد تعويضات دسمة ايلا ديبلاصيتي غا من الرباط ب 50 كلم، ايوا اخدم ولا سير تقوّد!

المشروع التنموي د الصح خاصو من اللخر عملية اصطياد الساحرات،، أي نقرقبو على المفسدين و ناهبي المال و حتى للي تسبب فسوء التدبير واخا ماشي شفار، حيث ايلا ما كنتيش قاد على المهمة ما تدخلهاش أصلا، ثانيا، حيد اقتصاد الريع، ثالثا ارفع يدين العائلات النافذة عن الاقتصاد، وخلي الناس العصاميين أيا كان انتماؤهم الطبقي يديرو بلاصتهم فالسوق ايلا كنتي تتآمن بالليبرالية الحقة، حيث رجال الأعمال فالبلاد للي تيقولو ليبراليين، الغالبية ملي تتحصل، تتولي اشتراكية و حمائية و تطالب بالدولة تدخل باش تنقدها من الغرق المبين…ايلا اتاخدتي هاد الاجراءات، راه التنمية غتخرج من تلقاء ذاتها

نرجو للمعادلة ديال : فلوس كثيرة تتساوي مفسدة كبيرة، هنا تنستحضر واحد التعليق تاع  المسرحي المرحوم الطيب الصديقي ملي ثارو معاه قضية الدعم د السينما…الصديقي قال ليهم بنبرة فيها سخرية سوداء بلي: المخرج ملي تنعطيوه un ptit budget تيدير لينا une ptite betise ويلا اعطيناه un grand budget، تيصاوب لينا une grande betise

انتهى الكلام

 

ابراهيم مبشور