فينا هو الـ”ميتر ناجور”؟.. شخص غرق فـ پيسين ديال أوطيل فـ طنجة

تكتب نهار 29 يوليو، 2021 مع 11:24 مجتمع تابعونا على Scoop

فمدينة طنجة عشية لبارح الاربعاء وقعات فاجعة اللي حشومة توقع فأوطيل سانك إيتوال وحنا كانقيلو نطبلو للسياحة.

شاب ثلاثيني كان كايعوم فـ لاپسين ديال أوطيل مصنف سميتو “فندق أهلا” حسب مصادر صحفية، ولكن غرق فظروف غامضة، وفاش انتابهو بعض نزلاء لوطيل، أن الشاب غرق، حاولو يعتقوه ويديرولو الإسعافات الأولية، ولكن روطار، الشاب كان ديجا مات.

جثة الضحية تم نقلها لمستشفى “دوق دو طوڤار”، وغادي يتم تشريحها بأوامر من النيابة العامة، فيما تم فتح تحقيق فالنازلة من طرف الأمن الوطني، باش يعرفوا واش لوطيل كان محتارم معايير السلامة ومن بينها وجود “ميتر ناجور” فـ لاپسين، وطبعا كون كان حاضر ماغاديش يوقع اللي وقع ويغرق الدري.