هادي عمارة من خمس طوابق فوسط مدينة الدار البيضاء المغربية،أحد المحسنين شراها و حوّلها لمسجد.

تكتب نهار 16 يوليو، 2021 مع 16:03 مجتمع تابعونا على Scoop

هادي عمارة من خمس طوابق فوسط مدينة الدار البيضاء المغربية،أحد المحسنين شراها و حوّلها لمسجد.

هاد العمارة اللي كانت فقط من طابق واحد و محلاّت تجارية، خرّج هاد المُحسن اللي كانوا فالمحلات فاش شراها عن طريق المحكمة باش يبني مسجد من عدة طوابق وسط عمارات سكنية مليئة بالعائلات و السكان.

الفكرة فحذ ذاتها مزيانة، تبني بيت يُذكر فيه إسم الله شيء جميل و نبيل، قال الرسول (ص) :
“من بنى مسجدا يبتغي به وجه الله بنى الله له بيتا في الجنة ”
لكن، واش هداك هو المكان المناسب فين تبني مسجد، الأذان اللي كيترفع خمس مرات عبر مكبرات الصوت على مقربة من الجيران، كل واحد و ظروفو، كاين اللي مريض، كاين اللي خدام بالليل خاصو ينعس بنهار، كاين اللي خدام بالنهار خاصو ينعس بالليل،كاين اللي عندو التربية،و كاين و كاين و كاين…

أكثر من مية عائلة فالباطيمات المجاورة أين حقوقهم فالحق فحياة هادئة وسط ديورهم اللي دفعوا فيها اللي وراهم و قداهم، أين حقهم فالعيش طرونكيل بعيدا عن مكبرات الصوت و ضجيج المصلين اللي طالعين هابطين فالسانك إيطاج ديال العمارة/المسجد؟

ثم فين عمرنا فتاريخ المذهب المالكي كان عندنا جوامع بلاصونصور و كونسييرج ؟
الشكل التقليدي اللي عليه إجماع من علماء الأمة فالمغرب الأقصى هو مسجد أرضي بصومعة فأحد الأضلع الأربعة ديالو.

هل نية هاد المحسن سليمة،و كيفاش السلطات اللي عطاتو الترخيص ما درساتش الموضوع من كل الجوانب ؟

واش كازا بجلالة قدرها ما بقاوش فيها أماكن اللي يتبناو فيها مساجد يُذكر فيها إسم الله ؟

ثم إلى كان هاد المسجد من محسن، شكون غا يخلص الصيانة ديال المصاعد و الإصلاحات و لونتروتيان و الإمام و المؤذن؟
و كيفاش هاد القضية ديال الريدشوصي خاص بالرجال، و الدوزيام و الطروازيام إيطاج عيالات، و عاوتاني الكاطريام رجال ؟
بان لي الدغل و الخشلاع فهاد التقسيم الجهوي اللي دار هاد المحسن.

و أخيرا و ليس أخرا، هل سيُسمح لصحاب الديسير و بائعي عود الأرك و الحبة السوداء يفرّشوا قدّام العمارة ؟
يتسائل أحدهم ؟