مروان أفلاي
من أكثر المرات اللي كنحس براسي مواطن مغربي عندي قيمة واللي خلاني عمري نندم على الطريق اللي ماشي فيه فإشادتي دائما بمجهود الدولة واللي غيخليني نزيد نكمل “تاعياشيت” لأكبر راس فالبلاد “الملِك” حتى ل “مهندس النظافة” فالشوارع !
كاملين عارفين ان المغرب هو البلد الوحيد اللي مواطنيه رجعوا لبلادهم من غير تكلفة درهم واحد ! برغم عدد العالقين الخيالي ! الامر بالنسبة للدولة ماكنش مجرد رجعوا المواطنين وخليوهم يعوموا فبحرهم ، الامر بالنسبة للدولة كان ان المغاربة يتعاملوا احسن معاملة مجرد ما يركبوا الطيارة والوقت اللي يوصلوا فيه لأرض الوطن تستقبلهم بالموسيقى وطرب الآلة والحلويات واتاي والحليب والتمر وكل واحد يتقالو مرحبا بيك فبلادك ويقولولك حنا هنا هدفنا الاول تكونوا مرتاحين ! الامر ماوقفش عند هاد الحد ! الدرك الملكي يجي يحاوط وسيلة النقل بالموطورات ويوصلك حتى لمكان الإقامة ! وفجأة المواطن البسيط يجيه احساس انه كيلعب فالبرسا ! و اذا بيه يكتشف مكان الإقامة هو”Marina Smir” احسن المنتجعات اللي موجودة فمدينة تطوان ! لا الامر ماوقفش هنا لا .. كل واحد غيعطيواه appartement على البحر يريح اعصابه من اخر تلت شهور فتركيا الكحلاء ! الامر ماوقفش هنا صبر .. تدخل l’appartement تجبر العشا فوق الطابلة ! تنعس تفيق فالصباح يدخلولك الفطور..
تكلفة كل ما سبق 0 درهم للتذكير مرة أخرى ! ويبقى سؤال القلة التافهة “آش عطانا المغرب ؟ عطانا الخير والعز وكاملين عارفين قيمة هاد البلاد إلا من غضب عليه ربي !
