تمكنات مصالح الدرك الملكي من توقيف ثلاثة قاصرين كانو هاجمو الطوموبيلات بالحجر فالطريق السيار اللي كيربط بين الجديدة وآسفي، ليلة أول أمس، قريب من نقطة البياج، وكانو غيتسببو فحوادث خطيرة وخسائر كبيرة فعدد من السيارات.
وحسب مصادر إعلامية، فالمهاجمين تخباو فالظلام على طول الطريق قريب من محطة الأداء فمدخل مدينة آسفي، وبداو يستهدفو السيارات اللي كدوز بشكل عشوائي.
هاد الهجوم تسبب فتكسر زجاج عدة سيارات وإصابة بعض السائقين والركاب.
المصادر أكدات أن عدة سيارات تعرضات للتخريب، وما يستبعدش يكونو ضحايا آخرين اللي ما تسجلوش.
هاد الحادثة كتعاتبر مؤشر خطير على تزايد العنف فبعض الطرق السيارة، حيث سبق ووقعو حوادث مماثلة فمناطق أخرى فالمملكة، وهاد الشي كيستدعي تكثيف الدوريات الأمنية وتشديد المراقبة على العناصر المشبوهة.
