منتدى دعم الحكم الذاتي فمخيمات تندوف المعروف بـ “فورساتين” فضح الفظائع والجرائم اللي كيعملوها انفصاليو البوليساريو ضد النساء اللي محجوزين فمخيمات تندوف.
فمنشور على حسابو فـ”فيس بوك”، أكد “فورساتين” بلي ساكنة مخيمات تندوف بداو يتحررو، وولات عندهم الشجاعة باش يفضحو الجرائم ديال جبهة البوليساريو، خصوصا الفظائع والخروقات الجنسية اللي كيتعرضو ليها النساء الصحراويات.
المنتدى الحقوقي شدد على أن القصة ما بداتش غير مع تأسيس مدرسة 27 فبراير للنساء، اللي كانت ممنوعة على الرجال إلا القيادة اللي كتدخل لها وقت ما بغات وتدير اللي بغات، وكانو كيجمعو فيها العيالات الزوينات من كل بلاصة باش يلبيو نزوات القيادة المريضة، وهاذ القضايا معروفة عند الناس ولكن الخوف من التشهير كيخلي بزاف منهم ما يهضروش.
المنتدى زاد وقال بلي كاينين “جيوش” ديال الوسطاء اللي مكلفين بجلب الفتيات للقيادة، وحتى جواسيس اللي كيقلبو على العيالات الزوينات داخل الخيام ومخادع الرجال، وملي كتعجبهم شي ضحية، ولات هي الهدف، وكيجيبوها بكل الطرق، سواء كانت مشروعة ولا غير مشروعة، وكاينين بزاف اللي كيبعتو رجالهم للنواحي العسكرية البعيدة باش يخلّيوهم مع زوجاتهم، واللي كترفض ولا تخبر راجلها ولا باها، كيتم تلفيق تهمة ليه وكيحبسوه، وكاينين اللي تقتلو بدم بارد فسجون وحفر البوليساريو.
المنتدى جاب قصص ديال بزاف الضحايا اللي كانوا زوجاتهم هدف لنزوات قيادات البوليساريو، وكان مصير الرجال هو الاختطاف، الاعتقال، والتعذيب، باش يخليو الضحايا بوحدهم.
