المكتب الوطني للكهرباء والماء الصالح للشرب، كيقوم بانجاز امشروع جديد، غادي يضمن توفير الماء الصالح للشرب لمدينة جرسيف والمناطق المجاورة ليها، و هادشي بالإعتماد على صبيب واد زبزيط.
فالبلاغ ديال المكتب الوطني، قالوا ان هاد المشروع كلف 470 مليون درهم، والمكتب هو اللي مول المشروع، بمساعدة من البنك الإفريقي للتنمية. المشروع كيتضمن محطة لمعالجة المياه غتعطي تقريبا 25 ألف و920 متر مكعب يوميا ، بالإضافة لخزان مائي بسعة 3500 متر مكعب، وزيد عليهم 80 كيلومتر ديال القنوات المائية اللي غادي توزع المياه.
و حسب البلاغ أيضا بداو استغلال المحطة قبل اكتمالها، وهادشي بفضل الجهود ديال فرق المكتب، اللي اعتمدوا على واحد المنطقة فواد زبزيط باش ياخدوا منو الماء الخام.
قدرة المحطة الحالية هي 13 ألف متر مكعب ديال الماء المعالج فاليوم، واللي غادي يضمن تزويد جرسيف والمناطق اللي حداها بالماء الصالح للشرب لغاية نهايةسد تاركا أومادي، اللي هو مشروع آخر.
