منير النصراوي و هو والد نجم فريق برشلونة لامين يامال، تعرض لاعتداء خطير ليلة الأربعاء اللي فاتت فمدينة ماتارو فإسبانيا.
جريدة “إلموندو” الإسبانية كشفت اليوم الخميس 15 غشت 2024، على أن الشرطة اعتقلت أربعة أشخاص كيشكو فتورطهم بهاد الحادث.
و حسب “إلموندو”، فالهجوم وقع بواحد الباركينغ ديال السيارات فحي روكافوندا، اللي هو المكان فين تزاد يامال ودابا كيسكن فيه والده وجدته. النصراوي تعرض للطعن، وداوه بسرعة للمستشفى الجامعي فبادالونا، و بالرغم أن الإصابة خطيرة، مصادر قريبة من العائلة أكدت أن حياته ماشي فخطر.
المعلومات الأولية كتشير أن الحادث ممكن يكون عندو علاقة بشجار وقع نفس اليوم. فحسب شهود عيان قالو أن النصراوي تعرض لمضايقات من طرف مجموعة ديال الناس وهو كيتسارى مع الكلب ديالو، وهادشي اللي خلا الشجار ينوض.
وتداولات مواقع التواصل الاجتماعي واحد الفيديو اللي كيبين تدخل الشرطة المحلية مباشرة من بعد هاد المشاجرة.
