لفتيت بدا يحقق فملفات التلاعب بالأراضي العارية، مساحات كبيرة فطنجة وبزاف دالمسؤولين يقدروا يمشيو فيها
مصادر مطلعة قالت أن وزير الداخلية عبد الوافي لفتيت كيدرس هاد الملفات اللي قد تؤدي لمحاسبة عدد من المسؤولين و رجال السلطة.
المصادر وضحات أن لجنة مركزية قامت بتفتيش عدة مدن كبرى فالمغرب، بحال طنجة والرباط والدار البيضاء، ولقاو خروقات كثيرة فعمليات استخلاص ضرائب الأراضي العارية.
التقارير كتقول أن بعض رجال السلطة كانو كيسهلو للملاك ديال الأراضي العارية الحصول على إعفاءات ضريبية، وهذا تسبب فخسائر كبيرة للخزينة العامة للدولة، حيت الملفات ديال الإعفاءات الضريبية كانت مجمدة وكان خاص يتم البت فيها فآجال محددة.
اللجنة المركزية لوزارة الداخلية عبرات عن دهشتها من تصنيف بعض الأراضي اللي كاينة فالمجال الحضري كأراضي فلاحية، رغم أنها ما فيهاش أي نشاط زراعي وكاينين حولها التجزئات والمباني السكنية، وهاد الشي كيعفي الملاك من أداء الضرائب المستحقة.
هاد الوضعية الغامضة ديال الأراضي الكبيرة، حسب المصادر، كتدل على تواطؤ بعض المسؤولين باش يسهلو للملاك التهرب من أداء الرسوم القانونية المفروضة عليهم، خاصة إذا كانت هاد الأراضي كبيرة الحجم.
