أطلق نشطاء مغاربة على مواقع التواصل الاجتماعي حملة كبيرة لمقاطعة استهلاك الدجاج، كاحتجاج على الارتفاع الكبير فأسعار هاد المنتج الغذائي الأساسي فالأيام الأخيرة.
الحملة جات فظل غياب أي تدخل حكومي باش يخفف من هاد الزيادات، واللي زادت من استياء المستهلكين.
المغاربة تداولوا بكثرة صور وتعليقات كيدعيو فيها للانضمام للحملة، وكيطلبو توحيد الجهود للضغط على المهنيين باش ينقصو الأسعار.
الحملة لقات تجاوب كبير من طرف المستهلكين اللي عبروا عن غضبهم من هاد الزيادات اللي أثرت بشكل كبير على ميزانيتهم، خاصة فظل الظروف الاقتصادية الصعبة اللي كيمر منها بزاف من الأسر المغربية.
ثمن الدجاج الحي وصل تقريبا لـ 30 درهم للكيلو، بينما الدجاج المذبوح جا فوق 40 درهم، وهو معدل قياسي ما شهدتوش الأسواق المغربية من سنوات.
هاد الارتفاع الكبير كيتعزى لدرجة الحرارة العالية اللي كضرب البلاد، واللي سببت فنفوق حوالي 30 في المائة من الدواجن، وهادشي أدى لنقص العرض فالسوق وزيادة الأسعار.
