عناصر الشرطة فالدائرة الأمنية العين الزرقاء فمدينة تزنيت بدات تحقيق بعد ما تعرض مواطن للتسمم من بعد ما كلا وجبة خفيفة فمحل (سناك) فالمدينة.
هاد التحقيق جا بعد شكاية تقدم بها المواطن بخصوص التسمم وأعراض المرضية لي ظهرو عليه مباشرة بعد ما كلا فالمحل المتواجد فشارع إدريس الحارثي، هاد المحل كان قبل شهر تقرر إغلاقه لمدة أسبوعين بسبب ضبط مجموعة من الأغذية الفاسدة فيه.
المصادر قالت أن المحل ممكن يتعرض للإغلاق النهائي، حيث ما ملتازمش بالشروط المطلوبة وماعندوش ترخيص لإعداد الوجبات، غير عندو ترخيص للتقديم والبيع.
السلطات الأمنية كاتسنى التقرير النهائي من خلية حفظ الصحة والبيئة التابعة لوزارة الصحة والحماية الاجتماعية باش يتاخذ القرار المناسب.
هاذ الحادث جا بعد أيام من الحكم لي صدر ضد صاحب “سناك” آخر فمدينة تزنيت، لي تسببت فتسمم 38 شخص، واللي تم الحكم عليه بسنة حبسا نافذا وغرامة 20 ألف درهم، و5 آلاف درهم تعويض للمطالب بالحق المدني.
