الحكومة البريطانية الجديدة وجهت صفعة قوية لمرتزقة البوليساريو بعدما عتابرت أن الأنشطة التجارية ديالها فالصحراء المغربية قانونية ومغاديش تراجع عليها.
الحكومة البريطانية، وفردها على سؤال كتابي للبرلماني “بن ليك”، عضو البرلمان عن حزب “Plaid Cymru ” لي كيطالب باستقلال ويلز عن المملكة المتحدة، أكدت أن النشاط التجاري ديالها فالصحراء المغربية قانوني وكيحتارم مصالح الساكنة.
الحكومة البريطانية، وفالجواب ديالها على لسان وزارة الخارجية بتاريخ 5 غشت الجاري، قالت أنها كدعم الجهود ديال الأمم المتحدة والمبعوث الشخصي ديال الأمين العام للأمم المتحدة فالصحراء، ستيفان دي ميستورا، وكتشجع على المشاركة فالعملية السياسية.
وكانت الجزائر والبوليساريو كيتمناو بريطانيا تغير الموقف ديالها من الصحرا المغربية بعد تشكيل الحكومة العمالية الجديدة، ولكن هاد الرد هو صفعة دبلوماسية قوية ليهم.
وللإشارة، فوزير الشؤون الخارجية والتعاون الإفريقي والمغاربة المقيمين في الخارج، ناصر بوريطة، سبق ليه دار مباحثات هاتفية مع وزير الخارجية البريطاني، ديفيد لامي، وهو نفس اليوم لي صفع فيه المسؤول البريطاني الجزائر والبوليساريو.
