الرياضات تيتعزلو ماليها باقين ما دخلوش للمدرسة

الرياضات راه تيتعزلو ماليها باقين ما دخلوش للمدرسة و خاص يكون عندك خبراء فالبنية و الانشطة البدنية. مثلا انت باقي صغير و درعانك طوال و باين غيخرجو عندك زوج خبّاطات من خلال الشكل تاع كفوف يديك، تيوجهوك للسباحة، كنتي امكوّر و عندك فورمة تاع الدجاج مارادونا من كثرة الكسكروطات و اغرارف داناب، تيقولو ليك سير اولدي، انت طير حتى تعيا و ما غتفوتش طريطور عندو كانڭو رمادية و ديبو د المّاعن و الجعب فدوار التقلية. نفس الميطود تديرها مع الدريات، الطفلة ايلا باينة من الصغر رشيقة و خفيفة و تتاكل من العينين، غيبان ليك فيها الجومباز او الجري أو شي رياضة تاع فنون الحرب، كانت شي مو طحشة، احناكها كل الواحد قد المسند و غا امتنتنة، ما تتحركش من بلاصتها بحال حجرة المحافظة، قول ليها فوذنها: انتي أميمتي ماشي تاع الميداليات، انتي ديك الطحشة عندك ديال شي امضمّة الصم و دوك الدرعان ديال شي طعريحة صمكة مع العونيات.
ابراهيم مبشور