الخميس 11 يوليوز 2019 الساعة 09:58



فرحة الأساتذة بالعطلة



 

 


حسن الحافة

الأساتذة والأستاذات فرحانيين بالعطلة، لدرجة فاقوا اليوم بكري كي شي دري صغير نهار العيد ؛ وطبيعي يذكرونا بأن اليوم هو أول أيام عطلتهم لي غتدوّم لحدود منتصف غشت، و بلا ما نفكروهم شحّال هذا وهما كالسين حتى سناوّPV البارح.. فبعملية حسابية بسيطة لا تحتاج لأنك تكون عبقري وداهية فالرياضيات، فمجموع أيام عطلة الأساتذة والأستاذات المحترمات جدًا، تكاد تصل لثلاثة أشهر، وفي حال ما كلت لشي مواطن كندي أو دنماركي بلي عطلة الأساتذة عندنا ثلاثة أشهر، غيشد كرّشو بالضحك، مستغرباً من وجود كائنات تستمتع بعطلة طويلة الأمد مدفوعة الأجر من جيوب الكادحين والكادحات، وسينبهرون بكون سماء المغرب، ومع هاذ الرّوينة لي فيه، لا تسقط حجارة.. ولي كيغفلوه أساتذنا الاعزاء، أنه مكاينش شي دولة فالعالم فيها عطلة هاذ المدة، من غير طبعاً، دول الريع لي كتراجع للخلف بسنوات ضوئية.

 

 وكنستحضر قصة طريفة لواحد السيد عندنا من الدوار خوّه فالنمسا، ولأنه مابغاش يديه معاه، والطلبات كثرت عليه وبغا يتهنى منها بالحيلة وبالكثير من المكر، قنعو يدير فيزا توريست فيها 3 أشهر لعندو.. الدرّي اجتهد باش يجمّع الوراق.. وروّج الحساب البنكي .. ودار أنه خدام فشركة لبث بعض الاطمئنان فصفوف البلد المستضيف بلي خدّام وجاي غا يدوز عطلة.. ونهار قاد كولشي ودفع الوراق؛ موظف تلقي الطلبات بقى يشوف فيه باستغراب ودهشة.. بانت ليه ثلاثة أشهر عطلة فالنمسا، وأعاد الوراق للظرف ورجعهوم ليه؛ وقال ليه بالحرف:


- هذا عنداش غادي محامّلكش  تجي عندو.. واش عمرك شفت شي عطلة فيها ثلاثة أشهر؟..

ارتبك الشاب حين سمع الرد، وأطرّق رأسه في شبه حرج من الموقف السخيف لي حطو فيه خوه...

 

ما يجهل أساتذتنا أن فالدانمارك وكندا وغيرهم؛ الأستاذ كيشد عطلة خفيفة وصغيرة لا تتعدى العشرين يوم مُقسّمة على فصلين، وبالموازاة مع عمله اليومي، خاصو يدير خدمة اجتماعية للصالح العام .. كيصبغ القسم.. يدير أعمال البستنة .. ينظف المراحيض.. يطلي الجدران.. يرسم جداريات.. وغيرهم من الأعمال لي الهدف منها تقويم سلوك التلميذ وحثه على المبادرة، ومن المفروغ منه، وعلى اعتبار الأستاذ قدوّة ومثل له على الأقل فالمرحلة الأولية، وملي غيشوفو مبادر لزرع الحياة، فغا يقلدو وتولي عادة..


ولي كيجهلوا مجددا أساتذتنا أنه في فترة معينة كانت العطلة عندهم مرفوقة بالصالح العام، وتا هم، في فترة ما، كانو يخدموا المنفعة العامة بشكلٍ أو بآخر..  إعادة الترميم.. حصص الدعم المُسبقة.. محاربة الأمية فصفوف نساء الحي أو المدشر.. العمل الجمعوي.. وثلاثة أرباع منشطو المخيمات الصيفية، ملي كانت المخيمات الصيفية، كانوا معلمين ومعلمات تطوعوا لخدمة الطفولة والشباب...


اليوم العكس.. بمجرد الأستاذ ما يوقع محضر العطلة تشوفو سعيد جدا بحال إلى مكانش حامل يخدم، وكإذلال للجميع، ثاني نهار، تلقاه داير En voyage a Espagne ، وأقلهم حظاً، غيمشي لموسم مولاهم عبد الله...


وواحد الأستاذة كتقري الابتدائي فقرية نائية فقيرة جدا ومهمشة فنواحي فاس، التلاميذ فيها منحدرون من أوساط أسرية كئيبة اجتماعيا... واش كتقريهم مزيان ولا مكتقريهومش، هذا بينها وبين ضميرها إلى كان عندها شي ضمير، وما استحضاري ليها بالذات، انها وبمجرد ما تشدّ العطلة، وحيث دايرة علاقات ثنائية القطب مع شباب مغاربة كاينين فأوروبا، كنلقاها كل ربعيام ولا خمسيام فدولة من الدول الأجنبية، وطبعا، شباب عنداش مشّات غيضمن ليها الإقامة والمبيت.. انا غير معني بما تقدمه فسبيل المبيّت، وما شغليش في حياتها الخاصة، لكن، من حقي كإنسان يدفع الضريبة على كل شيء، ولأن دوك الأطفال لي كتقري يعانون في صمت مريع، وحيث كتخلص بلا ما تأدي تا واجب لحظتها، ناهيك على انها كتستمع في ظل أنها خلفت خلفها مآسي اجتماعية فين كانت كتقري..


فهنا وجبَ علي التساؤل مجددا..

هل هناك عطلة فيها ثلاثة أشهر؟

ثم من تسترخص نفسها بغرفة مكيفة؛ أيّ جيل هو ستربي؟

 

والله أُعلم عاوتاني..






التواشي ديال الخناشي

بنجبلي ليس مجنونا

أكذوبة اسمها حسن أوريد

تجربة بائع متجول

رسالة. في أواخر الليل إلى المقرئ أبو زيد

الشيخ رفيقي. يكتب عن الجمال في رمضان






" يمنع منعا كليا نشر تعليقات السب والقذف وكل العبارات النابية "


* كاتب التعليق
* عنوان التعليق
* التعليق