الأربعاء 15 ماي 2019 الساعة 10:42



تجربة بائع متجول



 

محمد بنميلود

قبل سنوات طويلة خدمت مع واحد الشركة وهمية عندها مقر محشر فسلا. المقر عبارة عن دار وسط حي شعبي. دخلت عطاوني باليزة ديال البلاستيك كحلة وقاااصحة فيها شي سلعة: سيراج، صابون، معجون أسنان وفرشاة، لصاق، مقص ضفار.. إلخ.. غا التخربيق. ونسبة الربح فكل بياسة عيانة. خاص ندورو بالباليزة ونبيعو داكشي. مشيت أنا وصاحبي. نعترض سبيل المارة. بنادم غادي لخدمتو تا كتوقفو وتحل الباليزة بحال الطبيب البيطري وباغي تبيع ليه مقص الضفار ولا شيتة دالسنان. كيبقا غا يشوف فداك العجب وكيقول لك سمح لي وكيمشي.

 

عيينا ما ندورو والو. صدقنا حدا القامرة وانا نقترح على صاحبي نضربو الكيران. قلت ليه الهمزة كاينة فالكيران غندخلو غنبيعو كلشي ونمشيو فحالنا. كنطلعو للكار كنلقاو كلشي ناعس. كنبداو نبرحو: شيتات السنان السيراج الصابون إلخ.. والو.. واتاقول واش شي حد باغي يشري. كيشوفو فينا نظرات غريبة كأننا جايين من زحل. بنادم مسافر نتا باغي تبيع ليه صابونة. من بعد دخلنا لجي 5 وتفرقنا فواحد الزناقي وتلاقينا. أنا ما بعت والو. صاحبي باع جوج شيتات. قلت ليه كيف درتي ليها قال لي بديت كنقول للناس تعاونو معانا. تا انا دقيت على واحد الدار خرج لي راجل كبير لابس الجلابة وشاد الباب بيدو باش منشوفش الدار من لداخل. بقيت عليه بديك اللازمة ديال النصابة: هادي شركة عالمية والثمن مخفض والسيراج مكيتسالاش والصابون ديال الفرمسيان إلخ.. تا ساليت وهو يقول لي: شوف أ الشريف الناس لابغاو يشريو هادشي كيمشيو ليه للسوق ماشي تجي تدق على الناس. قلت ليه: خاص تتعاونو مع الشباب. قال لي: دابا نتا كتبيع ولا كتطلب. قلت ليه: صافي شري ولا الله يعاون نتا ما غتشريش وباغي تدير ليا محاضرة. دابزنا. طلع لي الدم.

 

مشيت كلست على ديك الباليزة فالشمس وكميت كارو مغوبش. صاحبي زاد باع سيراج. كانت وصلات شي الجوج. قلت ليه دابا نتا شحال رابح فهاد البياسات لي بعتي. قال لي تلاتة دالدراهم. قلت ليه طفرناها بكري. نضنا نكملو الخدمة. بديت كنمشي غا عند البنات ندوخ عليهم. هوما الوحيدين لي شراو من عندي. بعت شي بياسات تا وصلت فالرباح لخمسة دراهم مور العصر. قلت فنفسي: خدمة ديال الق.. هادي. دقيت فواحد الدار وهي تخرج لي واااحد البنت قرطاسة. لابسة كولون مزير ومعكرة وزويينة. أنا تلفت بقيت غا كنخربق وحال الباليزة وكنشوف فيها كتر ما كنشوف فالسلعة. بدات كتضحك. لصقتها بغيتها تشري صحة. قالت لي والله راني كاينة غا بوحدي فالدار كون كانت ماما نشري من عندك. قالت لي هاد الشيتة دالسنان عجباتني لابغيتي ترجع غدا نشريها من عندك. قلت ليها فخاطري باغاني نرجع على شيتة؟ بغيتي نتصاحبو أوكي أما الشيتة شريها غا من عند الباتيسري. تسالات لينا الهضرة وانا نقلب ديك الباليزة حدا رجليها وسط الدار. كلشي تشتت والسيراج دخل لداخل وبدينا كنجمعو فداكشي. قلت ليها شفتي السلعة بغاتك. تحنات وكتجمع معايا بحال دوك اللقطات الرومنسية فالأفلام. وانا نقول ليها شدي هاد الشيتة خوديها كادو مني. بقات كتضحك. قلت ليها بغيت نهضر معك عجبتيني ولكن مانديرش ليك المشاكل حدا داركم. إلى بغيتي نتلاقو غدا فالمدينة مع الستة حدا لاكار. قالت لي أوك. مشيت فحالي. ديك خمسة الدراهم لي ربحت صدقت مخلص بيها الشيتة.

 

 فالعشية رجعنا الباليزات للشركة وقلنا ليهم هادي والتوبة. الغد مشيت حدا لاكار نتسنا البنت. طبعا ما جاتش. شي ساعة وانا كنتسنا. مكانو لا تلفونات لا والو. صدقت خاسر الخدمة وخاسر البنت وخاسر الشيتة. قلت ليها فنفسي جيبي لي غا شيتي يا بنت ال .. يا بنت الناس.






أكذوبة اسمها حسن أوريد

رسالة. في أواخر الليل إلى المقرئ أبو زيد

الشيخ رفيقي. يكتب عن الجمال في رمضان

سيجارة. في يوم رمضان

من. "أنا يوسف يا أبي" إلى وصلة "الآذان والتراتيل "

بنكيران. مزال متصرطاتش ليه الصابونة






" يمنع منعا كليا نشر تعليقات السب والقذف وكل العبارات النابية "


* كاتب التعليق
* عنوان التعليق
* التعليق