الخميس 28 مارس 2019 الساعة 12:51



التنقاز



ديريكت

 

 

عبد الرحيم الوالي

كاينة واحد الفصيلة (وسمحوا لي على هاذ التعبير) كتفهم السياسة من قزيبتها. كلمة جوج كينقز للملك والقصر والنظام و... وإيلا مشيتي حتى حاولتي تشرح ليه وتفهمو كيكول ليك أنت مخزني وعياش. مع ذلك أنا غادي نحاول نشرح ليك أ راس الطارو. الملك عندو الاختصاصات الدستورية ديالو. ملي يكون الملك اللي اتخذ شي قرار فإطار هاذ الاختصاصات طبعا هو اللي مسؤول عليه. وكذلك الحكومة أ راس الطارو ملي كتتخذ شي قرار فنطاق ممارسة الصلاحيات الدستورية ديالها كتكون مسؤولة عليه.

 

لحد الآن الملفات اللي منوضة قربالة فالبلاد كلها من اختصاص الحكومة ماشي من اختصاص الملك. والحكومة الحالية من سوء الحظ أغلب الوزراء ديالها ما عندهمش الكفاءة السياسية باش يدبروا الملفات اللي مطروحة عليهم لأنهم إما خوانجية مولفين التيمومة والتسارح فالجوامع وإما وحدين جابوهم وصبغوهم بألوان ديال أحزاب سياسية واخا هوما ما عمرهم قرقبوها فالسياسة.

 

 وراكم كتشوفوا الجهل في أبهى حلله فالتصريحات وردود الأفعال ديالهم. إذن آش دخل الملك فهاذ الملفات؟ إيلا ولى الملك كيمارس صلاحيات الحكومة راه ولى كيخرق الدستور وملي كتطالب الملك يتدخل فاختصاصات الحكومة راك أ راس الطارو كتكول أن الملك خاصو يخرق الدستور وكتطالب بالاستبداد اللي أنت كيسحاب ليك كتناضل ضدو.

 

 المشكل أراس الطارو أن رئيس الحكومة وأغلبية الوزراء ما عارفين لا ما يقدموا لا ما يأخروا جايين تما باش يديروا الدوش والناموسية وياكلوا الشكلاط ويبانوا على عيالاتهم وصحاباتهم بأنهم وزراء أما الاختصاصات اللي عند رئيس الحكومة وعند الوزراء راه يمكن يغيروا بيها البلاد كون كانت عندهم الكفاءة السياسية والتدبيرية اللازمة. واش وزير ما عارفش حتى القانون والمساطر القانونية هذا شغل الملك؟ آش يدير ليه الملك مثلا؟ يقريه القانون؟ ولا يدير ليه الفلقة ولا اشنو؟ الملك براسو راه مرضوه فصحتو لأنه كيلقى راسو أمام رباعة ديال الجهلة ولخرازة كيبقاوا عليه ب"نعام سيدي" "الله يبارك فعمر سيدي" وكيكوزوا قدامو وهوما ما عارفين حتى وزة وما قادرين يحلوا حتى ملف.

 

 شكون اللي فشل معظم المشاريع ديال المبادرة الوطنية للتنمية البشرية؟ الملك ولا الحكومة والمنتخبين و...؟ شكون اللي عرقل المشاريع فالريف ونوض قربالة؟ الملك ولا الحكومة؟ أسيدي نهار يكون الملك فإطار الاختصاصات الدستورية ديالو اتخذ شي قرار ظالم وما نكولوهاش ذيك الساعة عندك الحق تنعتنا باش ما بغيتي. أما دابا اللي مسؤول على هاذ الاحتقان الاجتماعي هو الحكومة لأن جميع الملفات الاجتماعية اللي مطروحة حاليا من اختصاص الحكومة وجميع القرارات اللي أدت للاحتقان هي قرارات حكومية.

 

 خليونا من التخربيق. التخربيق تخربيق والسياسة سياسة. الروز روز والزغب زغب (وبلا ما نعاود ليكم النكتة ديال الروز والزغب راكم عارفينها. خليونا نحشموا على عرضنا).






البيجيدي والالحاد

فضح الفضائح

الجمهوريون

خطاب الجهل

هنيئا للشعب الجزائري

التحدي الأمني






" يمنع منعا كليا نشر تعليقات السب والقذف وكل العبارات النابية "


* كاتب التعليق
* عنوان التعليق
* التعليق