ذكرت القناة الإسرائيلية 13 في خبر بثته أمس الاثنين باللي “ملك المغرب محمد السادس رفض عرضا باعتراف أمريكي بسيادة المغرب على الصحراء مقابل علاقات دبلوماسية مع اسرائيل”.
هاذ الخبر مهم وكيأك باللي المغرب معندوش مع التخلويض. وما عمر المغرب دار من القضية الفلسطينية سجل تجاري باش يحقق مصالحو..المغرب واضح ونيشان في مواقفه. قضية الصحراء أكبر من أي مساومة يديرها شي حد فالدنيا. راه قضية كل المغاربة كبيرا وصغيرا من جلالة الملك محمد السادس إلى آخر مواطن مغربي.
ما يمكنش نحطو قضية الصحراء في المزايدة. فلسطين حق تاريخي. المغرب آمن بحل الدولتين من سنين طويلة. لكن دائما كان مع حق الشعب الفلسطيني في دولة حرة ومستقلة وعاصمتها القدس الشريف.
جلالة الملك راه هو رئيس لجنة القدس الشريف والمغرب هو اللي محتضن بيت مال القدس. كيفاش غادي تحطو مريكان وإسرائيل أمام الأمر الواقع. كيفاش تدير مع بلاد عريقة الشونطاج؟
فلسطين حق تاريخي لأصحابها والمغرب كان ديما فصفهم وأي خطوة دارها هاذي سنين طويلة كانت ديما باتفاق مع الفلسطينيين. والصحراء راها مغربية قبل ما يكون هاذ الكيان اللي سميتو إسرائيل وقبل ما تكون حتى مريكان. راه الجذور تاريخية وبيعة الصحراويين للملوك المغاربة ممتدة في التاريخ.
تعتارفو ولا ما تعتارفوش هذا شغلكم. المغرب له حق تاريخي. وعندو حكم ديال محكمة لاهاي اللي هي محكمة دولية وكتعبر على ضمير المنتظم الدولي. إذن ما يجي حد يقول للمغرب خاصك تساوم على بلادك.
