بزاف مفاهمينش ديك القضية ديال الاتفاقية ديال البنوك وإنشاء المقاولات.. والي كانت تحت إمرة الملك..
هاد المقاولات بتمويل مجاني يعني الدولة لي غتكلف ليك بكولشي نتا ماعليك غير تختار المشروع لي طاح فبالك و عندك حلم تحققو ….
من بعد ما استقريتي على المشروع لي باغي دير… غتمشي للعمالة ديال مدينتك و غتقوليهم انا باغي ندير مقاولة، غيوجهوك لواحد المكتب بالعمالة سميتو “مكتب التعاون “، غيستقبلوك و غيناقشو معاك فكرة المشروع و غيعطيوك وراق تعمرهم و تجيبهم..
من بعد أسبوع غتاصل بيك اللجنة و تناقش معاك المشروع، لكن ماتقولش هاد اللجنة تعجيزية غتصدرني بالعكس هادي خدمتهم باش تعاونك، لأنها تابعة “للمبادرة الوطنية للتنمية البشرية ” لي عندها فائض ديال 11 المليار مخصصة ليك و للشباب لي باغين يديرو مقاولة بتعلميات من الملك باش الشباب يخدم ويخدّم معاه الناس و تنقص البطالة.. غيشوفك غير واش بصح عندك افكار و متمكن من المشروع وتايق فراسك ولا غير جاي تدي الفلوس… الخدمة ديالها هي تمولك ب %70 من المبلغ لي قلتي ليهم، مثلا خصّك 10 ديال المليون باش دير المقاولة، غتعطيك هي 7 ديال المليون…
دابا بقات ليك 3 ديال المليون منين غتجيبها ، تاهي اسيدي كاين الحل غتمشي عند الأبناك غتقوليهم بغيت قرض لإنشاء مقاولة صغرى.. غدخل عند المسؤول و تقنعو بالمشروع باش يعطيك الكريدي مثلا 3 المليون.. وهاد القروض خاصين بالشباب أصحاب أفكار إنشاء المقاولات.. هانتا جمعتي 10 ديال المليون فااااابور خاسر غا شوية ديال الوقت…
ملاحظة هامة : فاش غتمشي العمالة ممكن تلقا جوج مشاكل :
– أولا غيقولو لك جيب لينا “دراسة الجدوى ” هاد دراسة الجدوى هي دراسة شاملة للمشروع كتقام بالفلوس..
إوا سيدي نتا غديرها فابور و غتمشي لANAPEC ، غنقوليهم عندي فكرة مشروع و بغيت ديرو ليا “دراسة الجدوى ” غيقولو ليك مرحبا و غيخدمو ليك ضوصي فابور (خدمتهم هاديك) و ديه للعمالة..
– ثانيا : يقدرو فالعمالة يقولو ليك خصك المحال و نتا ماعندكش وماعندكش باش تكري، غتمشي تدي ليهم فقط “وعد بالكراء” من شي كراج كافية، و من تخرج ليك الفلوس عاد سير كريه.
ونزيدك كاين صندوق دعم المقاولات الصغرى المهمة ديالو هي يساعدك في حالة لقيتي مشكل فالمقاولة مثلا مانجحتش.
تذكير : سواء كنتي بوحدك ولا نتوما مجموعة ديال الدراري.. قاري ولا مقاريش.. عندك دبلوم ولا ماعندكش.. هادشي كامل لي قريتي راه من حقك..
المهم هادشي ماشي حلم، سير تحرّك و سوّل على راسك، وخدّم معاك الدولة و قلّب على حقك.
تحياتي..
