ابراهيم مبشور
داك المهرجان د البيرة قاليك تلغى حيث خافو ينوض عليه الصداع، وفعلا راه ملي تعلن، كان موضوع الساعة فالقهاوي وعند الحلّاقة وفالطاكسيات لكبار والكوابن هو المهرجان، والنغمة وحدة: “اللاهومايناهادالامونكار”
ما افهمتش السبب ديال هاد ليستينكار والمغرب ايلا حيدتي رمضان، ما تبقى من الأيام كولها مهرجانات د البيرة و كارنافالات تاع الروج وملتقيات ديال الماحيا. ديرو طلة على عائدات المشروبات الكحولية فالبلاد، أكيد غتصدمو من هول الأرقام، راه كون طبقو القانون تاع منع بيع الكحول للمسلمين، كون “براسري المغرب” قلباتها ما د الزهر فالستينات.
زعما تعول على نصراني هو للي يروج ليك الزاج لخضر؟ ڭاوري تيدخل للبار يضومونضي تورني د الريكار يبقى يتمزكك عليه وملي يبغي يخلص يجبد بزيطيم و يبقى يقفقف، ولد ال…. ما تصور من عندو حتى 2 دراهم بوربوار.
المغربي فالصباح تيضرب 5 سبيسيال غير باش يحيد بيهم التمن ديال البارح من باب وداوني بالتي كانت هي الداء. فلوس الريكار د الڭاوري تيعطيها غير المرا للي مقابلة الطواليط باش تهلا فالوليدات. تنعرف واحد لاكليك كانت تتمشي السبت لواحد البار ريسطو غير باش يتغداوْ ويضربو كويسات البيريتيف، تيصدقو شادينها حتى تيبدا البار يطفي فالضواو و عبسلام الفيدور تيدور عليهم و يصفق: ” يالاه ألفاميلا…يالاه أخوتي هذا جهد للي ما يبات!”
أغلبية المغاربة عندهوم شخصيات مزدوجة…داك اللواط للي تيتبع الدريات قد بناتو هو للي تتلقاه تيدور فالإقامة السكنية يجمع التوقيعات حيث فلان للي كاري فالري د شوسي تدخل عندو صاحبتو وحنا امزوجين و عدنا بناتنا و…و…و.. داك للي تيصلي بالناس و تيهضر على الأمانة تيكون مدّي لضحايا فلوس كحلة بعدما واعدهم بكونطرادات للسعودية .
أما السكايرية فراه هوما الأوائل للي ضارباهم النفس على الدين، تتلقاه حاط طرواكار فالبار وامدور بيه 2 … وتيعاود لصحابو : “داك الضواهري راجل وهو المسلم تاع الصح، راه طبيب و جرّاح، خلى اللعاقة و الكلينيك و الفيلا وامشى تيجاهد، عايش غا فغار، كون كانوا المسلمين كاملين بحالو كون ما يخصنا تا خير”.
السكايري تاع بوك، كون خلاوه حتى وصل عندك، كون داك الطرواكار طلعو ليك ف… بالكيسان ديالو!
