- Advertisement -

- Advertisement -

- Advertisement -

البلاد اللي ما فيهاش مول جافيل ومول النعناع والمقدم ماشي بلاد

محمد بنميلود

فالمغرب واحد مول جافيل كان كيفيقني كل صباح. مع التسعود نيشان كيدوز من زنقتنا. مكيعرف لا سبت لا حد لا عطلة لا باغين نعسو لا والو. كيجي تا لحدا الشرجم ديالي وكيغوت: جاااافيييييل.. جافييييلللل. غا كنسمعو كنقول فخاطري صبحنا على الله. أنا بايت سهران تا للتمنية ديال الصباح وهاد النم باغي يبيع ليا جافيل مع التسعود. بحالا غادي نوض نصبن الزرابي. كيدفع كروسة مخرخشة معمرها بادز ولابس طابلية شيبية باهتة وجيابو عامرين بالصرف.

كنبغي غا شي مرة نقول ليه شوف أ الشريف راه كون كان داك جافيل ديالك فيه الفايدة كون را الطابلية ديالك كاعما بهاتت. ولكن كندير بناقص. كيغوت جافييييييل ومن بعد كيسكت. كنرجع ننعس. غا كيتغمضو عيني وكنبدا نحلم كيغوت تاني جاااافيييييل. كيكون سكت غا حيت جات شي مرا تشري من عندو. غا كيدخل الصرف فجيبو وكيقرقبو باش يتأكد أنو دخلو فجيبو فعلا عوض يكون لاحو فالأرض وكيديماري تاني بصوت أقوى وأبشع وأشد نشاطا جاااافييييل. إيوا نعس نتا ولا فيق ولا شوف شنو دير…

- Advertisement -

من بعد وليت كنفكر نهاجر من المغرب غا بسباب هاد مول جافيل. دار ليا مسمار جحا فدماغي. وليت كنقول فنفسي والله لا بقيت هنا وهاد مول جافيل شاد هاد السيكتور. يا هو يا أنا فهاد البلاد. زيد عليه الكلاكصونات والغوات وزديح البيبان والمدابزات فالليل والنباح ديال ستين ألف كلب مربيهم العساس.

نهار كنت غادي للمطار قلت فنفسي لمول جافيل: وجيب كروستك دابا وتبعني.

هي هاديك أسيدي جينا لهاد لبلاد. مكاين غا الصقيل. الدبانة مكتزنزنش. أصلا ما عندها لاش تزنزن والزبل ما كاينش. تقريبا أصلا الدبان مكاينش. بل بالتأكيد وليس تقريبا. الله على راحة. حسيت براسي نتاقمت من مول جافيل. حتى الكلاب ما كينبحوش. تصورو معايا أن الجيران عندهم كلب والله ما عرفتو كاين إلا بعد ثلاثة أشهر. كلب ما عندوش نهائيا لاش ينبح. النباح نوع من التظاهر أو الاحتجاج من أجل المطالبة بالحقوق وهو كلشي عندو لاش غادي ينبح؟ إضافة إلى ذلك مكاينينش لصوص وبالضبط هو ما عارفش ما معنى لصوص بالتالي عمرو اختابر ديك لوبسيون ديال النبيح.

واحد شهرين متتالية وأنا مستمتع غا بالهدوء والصمت والسكينة. خصوصا فالمساء، زيرو ضجيج.

شوية بديت كنتنوا بكثرة الصمت. بدا كيجيني فبالي بحالا الناس كاملين ماتو وبقيت بوحدي حي والبوليس غادي يجيو يقولو لي نتا لي قتلتيهم. بدا هاد الهاجس كيسيطر علي. وليت كنقول ياربي غا يجي مول جافيل واخا غا مرة فالسيمانة. وليت كنطل من الشرجم عريان وكنغوت: بغينا الهدوء والسكينة نعم أ خوتنا ولكن ماشي هدوء وسكينة المقابر. تحركو معانا شوية الله يخليكم راه هاد السكات ديالكم قود من الغوات ديال مول جافيل.

والو تا حد ما سوق ليا. آرا ما تغوت مكاينش لي يدير ليك فيه الملح. غا الموتى. باردين كتر من الثلج. وتا كلابهم باردين. شوية ولا الهدوء والصمت كيزعجوني. أنا راه مولف الهيلالة ما مولفش هاد الصقيل. كانت ودني غا عيات وبغات تساراح ماشي بغات تولي صمكة مكتسمع تا لعبة. مع الوقت ما بقيتش قادر على الصمت. بدا كينرفزني كتر من الصداع. لسبب بسيط وهو أن الصداع كيكون غا فلحظة، كيجي وكيمشي، مثلا شي حد كيغوت ومن بعد كيسكت. أما الصمت فراه مستمر. لا يتوقف ولا يتغير ولا ينتهي إلا بجنونك..

أخيرا عاد عرفت قيمة مول جافيل خصوصا بالنسبة إلى كاتب، وعرفت أني غا ما كنتش حامد الله وكان كيصحاب لي الجنة كاينة خلف البحر وكان كيصحابني أن الحياة هي في مكان آخر كما قال كونديرا. بل لقيت الحقيقة هي راه إلى ما لقيتيش الحياة حدا رجليك ميمكنش تلقاها فشي قرينة كحلة أخرى واخا تكون جنة.

الفكرة الوحيدة لي مسيطرة علي منذ شهر هي: بلاد ما فيهاش مول جافيل وما فيهاش خالتي زايدة السرغينية الضبة، وما فيهاش عياش مول النعناع، وما فيهاش المقدم، ماشي بلاد. أما مول جافيل فديت منو الذنوب غا فابور وعوض ما ننتاقم منو وليت كنحس أنو هو لي نتاقم مني بحيث خويت دارنا أولا وثانيا حرمت من صرخات حنجرته السمفونية الشقفاوية (نسبة إلى الشقوفا) كل صباح.

اترك رد

لن يتم نشر عنوان بريدك الإلكتروني.