مصطفى لخصم، نجم رياضة الكيك بوكسينكَ السابق، كان دار فيديو هادئ و رزين كيحلل فيه مباراة ابو زعيتر مع الكندي اللي خسر فيها.. وقدم ليه نصائح وقال ليه ماكنتيش مستعد، وبلا ماتبرر الهزيمة بالعنصرية و غيرها من الامور لكن ابو زعيتر اتصل به برقم مجهول وسبو بكلام خايب ديال “ولاد السوق”.
لخصم قال فلايف ليه على “فيسبوك”، أنه “هذ أبو زعيتر فين بغا يوصل مايمكنش يوصل لهذ المستوى ويسب الوالدين.. هو أصلو ماشي طيب والمستوى ديال التربية ناقص بزاف، بالحق باش يعيط لي أنا ويسب لي الوالدة والدين فماغانسكتش ليه… وغالط كيحساب ليه حتى واحد ما يوصلو وراه غالط… وانا ماخايفش منو”.
“ما كتسوى حتى بصلة، ما رياضي ما والو، بطل ألمانيا ماشي العالم، وليزادفيرسير اللي كتلعب معاهم فUFC، لا نتا لا خوك، ضعاف، والماتشات ديالك ماشي رئيسيين على ما تعمر القاعة باش يتفرجو الناس فالطوب، غير باش ماضحكوش على الناس المستوى ديالكم هابط “بزاف”، كيقول لخصم.
وزاد لخصم كيوضح، أن اتصال أبو زعيتر بيه جا من بعد ما دار عليه لخصم شي خرجة عليه، “أنا ماقلت تاحاجة ماشي هي هذيك اللي كاين قلتو ما سبيتك ما هبطت بيك، كليتي قتلة دالعصا حيت قلتليك ماترينيتيش، معروفة ماتشفيناش فيك”.
لخصم ختم اللايف ديالو بالقول “أنت بهذ الفورمة وأنا بهذ الفورمة ومشحال هذي ماترينيت وناكلك، وإلى قلبتي عليا غاتلقاني”.
لخصم خرج ففيديو، من بعد هزيمة أبوزعيتر يوم السبت الماضي مع الخصم الكندي مارك أندري باريولت، قال أنه ماكانش واجد وماتريناش مزيان.
