همزة. اسبانيا غادي تخدم كثر من 16 ألف مغربية فجني الفريز

تكتب نهار 15 نوفمبر، 2019 مع 15:13 مجتمع تابعونا على Scoop

اسبانيا ناوية تخدم تقريبا 16 ألف و500 مغربية في الحقول ديال الفريز، هذا ما قالت وزارة الشغل فواحد البلاغ ديالها، هذ الخدامات غادين يمشيو لإقليم ويلبا جنوب اسبانيا باش يجنيو لفريز فإطار عميلة انتقاء العاملات برسم موسم 2019/2020.

البلاغ ديال الوزارة، نهار الثلاثاء، قال أن  إسبانيا واعدات فاجتماع مع وفد مغربي، باش تتوصل السلطات المغربية بتراخيص العمل فشهر يناير الجاي والخدمة تبدا في شهر مارس 2020 بالنسبة للعاملات المرشحات اللي غيمشيو أول مرة، أو بالنسبة للعاملات القدامات حددو بداية شهر دجنبر الجاي كموعد باش يشدو الرخص ديالهم باش يمشيو لاسبانيا ففبراير 2020.

هذ الإتفاق شرف عليه الكاتب العام لوزارة الشغل والإدماج المهني، أو معاه المدير العام ديال الأنابيك والقنصل دالمغرب فإشبيلية وعدد من المسؤولين، وحضر عن الجانب الإسباني المدير العام للهجرة بوزارة الشغل والهجرة والضمان الاجتماعي والممثلين ديال كتابة الدولة لشؤون الهجرة ومكتب الشغل والهجرة لدى مندوبية الحكومة بإقليم ويلبا، زيادة على مستشار ديال سفارة إسبانيا بالرباط.

هذ الاجتماع اندرج في إطار تعزيز التنسيق بين البلدين في مجال تدبير العمل الموسمي بإسبانيا، وذلك بهدف التحضير مزيان لعملية تشغيل العاملات المغربيات فالموسم الفلاحي 2019 / 2020. وحسب البلاغ، هذ المباحثات غتمنح تراخيص العمل لمدة لا تقل عن ستة أشهر من أجل تمديد مدة العمل لدى المشغلين، ودراسة تمكين سفر العاملات فالبحر مباشرة من طنجة لمدينة ويلبا.