شحال كاع غادي يخسر الرميد اذا خلص CNSS على الكاتبة ديالو

تكتب نهار 18 يوليو، 2020 مع 11:36 مواقف وآراء تابعونا على Scoop

عبد الرحيم الوالي

دابا عاد بغيت نتكلم على ذوك المحامين اللي مخدمين كاتبات بجوج فرنك وما دايرينش ليهم الCNSS. بالحساب إيلا خدمتي كاتبة وخلصتيها مزيان ودرتي ليها 6 آلاف درهم فالشهر يالله غادي تخلص عليها تقريبا 1200 درهم شهريا ديال ال CNSS. يعني تطلع عليك ب 7200 درهم شهريا اللي أنت كتشد أكثر منها فملف واحد. وملي كيتعلق الأمر بمحامي بحال الرميد واقيلا 7200 درهم كيقدر يدخلها فنهار نظرا لحجم الملفات اللي كتروج فالمكتب ديالو.

زيد على هاذ الشي شحال من عام وهو برلماني وزيد عليه شحال من عام وهو وزير. وبما أنه من المستبعد يكون داير للكاتبة 6000 درهم كأجرة غادي نديروا حسن النية ونفترضوا أنه كان داير ليها 3 آلاف درهم. فهاذ الحالة غادي يكون مجموع المستحقات ديال ال CNSS تقريبا 600 درهم. يعني بالحساب ديال المغاربة 12 ألف ريال فالشهر. يعني 20 درهم فالنهار. يعني ثمن بكية ديال الكارو من النوع الرديء. وأقل من ثمن قهوة كحلة فال Hall ديال أي أوطيل. وأقل من ثمن سندويتش فأي سناك فوسط المدينة. وثمن تحسينة عند حلاق فحي شعبي. إيه نعاماس 600 درهم طامع فيها كيديها لجيبو وما يخلصش للسيدة ال CNSS. وتجي تكول لينا الله والنبي وأبو بكر وعمر والصحابة والتابعين. 600 درهم فالشهر، 20 درهم فالنهار، ولكنكم لا تحشمون.