وزارة الثقافة و الشباب و الرياضة، اللّي الوزير ديالها الحالي هو لحسن عبيابة، كانت دارت كونكور ديال التوظيف فشهر 9 اللي فات، كتابي وشفوي.
نجحوا و تقبلوا فهاد الكونكور 90 موظف، داروا تكوين ديال 15 يوم فشهر أكتوبر الماضي، كلشي داز بخير و على خير، دوزوا الفحص الطبّي فشهر نونبر.
نهار الجمعة اللي فاتت، إتصلوا بيهم باش يلتحقوا بالوزارة نهار الإثنين على حساب التعيينات، يعني البارح.
فاش مشاو، قالوا ليهم التعيينات تأجلات لأجل غير معلوم و لأسباب مُبهمة حسب تصريح إحدى الناجحات (مصدر الخبر و صديقة فاللائحة).
و اليوم راجت أخبار من وسط هاد الموظفين الناجحين أنه غا تعاود المباراة بسبب الطعن و الشكّ فالنتائج، مع العلم أن الطعن كان خاصوا يكون بعد صدور النتائح مباشرة، و ليس بعد مرور أزيد من 3 أشهر.
أغلب هادوا اللّي نجحوا من الطبقة المسحوقة، وليدات الشعب، جاو من مناطق نائية تكرفصوا ونحجوا بذراعهوم، و كانوا خدّامين فالقطاع الخاص و سمحوا فخداميهم و قدموا إستقالاتهوم، لأنهم ضمنوا الوظيفة فالوزارة من بعد هاد المراحل كاملة اللّي قطعوها.
من شهر 9 و هوما كيجرجروا فيهم، ها إمتحان كتابي، ها شفوي، ها فحص طبّي، و من بعد يقولوا ليهم غا نلغيو الكونكور و نعاودوه، رغم أنه ما كاينش شي تأكيد رسمي من الوزارة لحدّ الأن المباراة غا تعاود، لكن هادشي اللي كيروج فالكواليس.
كيفاش وزارة السي لحسن عبيابة كتلاعب بمصير 90 موظف و موظفة بعائلاتهوم بوليداتهوم بمستقبلهم، و المباراة أصلا كانت فيها لجنة كتمثل مختلف المصالح فالوزارة حسب مصدر الخبر، ورشيد الطالبي العلمي الوزير السابق كان صادق عليها، و تجيو بجرّة قلم و تقولوا ليهم ما بقيناش لاعبين.
هاد الموظفين التسعين معتصمين حاليا أمام الوزارة فالرباط حتى تعطي ليهم تاريخ محدد للتعيينات باش يمشيو يلتحقوا بلي بوسط ديالهوم ويخدموا على وليداتهوم.
