هشام شارم
فالوقت اللّي أكثر من 800 ألف عائلة ما لاقية ما تاكل فالمغريب و مازال كتسنا فديك ال 1000 درهم من شهر مارس الماضي، الحكومة المغربية تتوزع الملاين على 21 صحفي ناشرينهوم فداك المجلس الوطني للصحافة اللي ما لايق لتا حاجة من غير إستنزاف خزينة الدولة و أموال دافعي الضرائب اللّي الأولى تمشي للفوقارا و المغاربة المقهورين بسبب هاد الكارثة ديال كورونا.
هانتا حسب معايا عزيزي المتابع، شحال كيدّيو هاد الأعضاء اللّي ديجا عندهوم خلصتهم مع الجرائد و الصحف و المواقع الإلكترونية اللي خدّامين معاهوم و اللّي حتا هيا كتاخذ أصلا دعم سنوي بالملاير من عند هاد الحكومة عاوتاني.
كيف ما مكتوب فمرسوم القانون، العثماني ما بغاش يقول لينا شحال غا يشدّ رئيس المجلس الوطني للصحافة، خلاّها من أسرار الدولة، لكن قال لينا شحال غا يشدّ النائب ديالو من نهار تعيّن، يعني غا يتخلّص بأثر رجعي و غا تبقا تجيه 12.900 درهم شهريا زيد عليها 3060 درهم على كل يوم عمل، إلى فهمتي شي حاجة فهّمني، يعني غا يشد مليون و ستّين ألف ريال فيكس، و ستّين ألف ريال على كل بريكول جا ليه نائب الرئيس للمقر ديال هاد المجلس ، و حسب مع راسك شحال غا يطلع ليه هاد البريكول فالشهر.
أجي دابا للأعضاء، العثماني كيعطيهوم أ سيدي 7142 درهم للراس شهريا، زيد عليها 2200 درهم عن كل يوم عمل “خدموا” فيه فالمجلس، و حسب مع راسك شحال غا يطلع ليهم تاهوما فهاد البريكول فالشهر.
الرئيس و النائب ديالو و الأعضاء إلى خرجوا من مقر المجلس اللي كاين فالرباط و هبطوا مثلا لكازا، غا يعطيهوم العثماني 700 درهم فاليوم على الديبلاصمو، و إلى فاتوا الحدود مور البحر، غا يلوح ليهم فالكونط 2000 درهم فالنهار، و الحسّابة بتحسب حتى يرجعوا لأرض الوطن سالمين غانمين.
هاد الأعضاء الصحفيين إلى كانت فيهم ذرّة ديال المواطنة و الإنسانيةو غرام ديال النفس، خاصهوم يخرجوا و راه كلهم معروفين و عندهوم حسابات فالفيسبوك، و يكتبوا تدوينات كيرفضوا فيها هاد الريع و تبذير المال العام اللي ناس خرين في أمس الحاجة إليه.
