ربعة ديال الإرهابيين طاحوا في يد البوليس الإسباني بفضل تنسيق مع البوليس المغربي، والزعيم ديال الخلية المتطرفة مغربي هارب من العدالة من وقت سابق، وهو اللي كان كيسقطب الإرهابيين. مصادر قالت لسكوب أن العملية كان فيها تنسيق كبير بين المغاربة والإسبان.
أخطر واحد في الخلية الإرهابية، اللي تشدات في برشلونة، هو هاذ المغربي الهارب من البوليس المغربي، واللي كان في البداية استقر في برشلونة، لكن كورونا دفعاتو باش يخرج يخدم في الفلاحة، لأن وضعو المالي تكرفس مزيان وهو يحصل في يد البوليس.
هاذ الإرهابي كان متحمس باش ينفذ شي عملية إرهابية، وهو اللي دفع البوليس الإسباني باش يتدخل في الوقت المناسب باش متوقعش شي كارثة أمنية. هاذ المغربي كانت عندو لقاءات مع مقاتلين من داعش، وكان كيتواصل معاهم بطريقة متطورة، وكان عندو تطبيق كيخرب الرسائل مباشرة من اللي كيسالي التواصل.
البوليس ديال إسبانيا حجز وثائق كثيرة مع المتطرفين وسلاح أبيض وما استبعدش أنو كان على أهبة الإعداد لعمل إرهابي، ونهار الجمعة غادين يقدموهم أمام المحكمة.
